Bæjarráð Fjallabyggðar samþykkti á fundi sínum 30. mars síðastliðinn að taka þátt í könnuninni „Sveitarfélag ársins 2025“, sem unnin er í samstarfi Mannauðssjóðsins Heklu og Gallup.
Erindið sem lagt var fyrir ráðið fól í sér boð til sveitarfélaga um þátttöku í viðamikilli starfsmannakönnun þar sem lagt er mat á starfsemi sveitarfélaga út frá sjónarhorni starfsfólks. Slíkar kannanir veita mikilvæga innsýn í vinnuumhverfi, starfsánægju og stjórnun innan sveitarfélaga og geta reynst gagnlegar við áframhaldandi þróun og umbætur í rekstri.
Samkvæmt gögnum málsins er áætlaður kostnaður Fjallabyggðar vegna þátttöku í könnuninni um ein milljón króna.
Bæjarráð samþykkti bæði þátttöku í könnuninni og þann kostnað sem henni fylgir.
