Skógarþröstur er meðal þeirra farfugla sem hafa sést í Siglufirði á síðustu dögum. Mynd: Steingrímur Kristinsson.
Vorfuglar eru nú farnir að láta sjá sig í Siglufirði og ber það skýrt merki um að vorið sé á næsta leiti. Þetta kemur fram í tilkynningu frá Fuglavinafélagi Siglufjarðar, þar sem bent er á að fleiri tegundir séu væntanlegar á næstu vikum.
Nokkrar tegundir hafa þegar sést á svæðinu undanfarið. Þann 9. mars sáust tveir tjaldar og 25. mars var álft á ferð. Þá flugu fjórar álftir yfir Leirurnar 6. apríl. Sama dag sáust einnig að minnsta kosti þrír skógarþrestir.
Tveir tjaldar sáust í Siglufirði 9. mars og marka upphaf farfuglakomunnar. Mynd: Steingrímur Kristinsson.
Fuglavinafélagið hvetur áhugasama til að fylgjast með komu farfugla á næstu vikum og bendir á að hægt sé að kynna sér frekari skráningar á vef félagsins, siglofuglar.com.
Þeir sem verða varir við nýjar tegundir eru hvattir til að láta félagið vita með því að senda tölvupóst á netfangið fuglavinir@gmail.com.
Hér má sjá fleiri farfugla sem sést hafa í Siglufirði.
Myndir með tilkynningunni tók Steingrímur Kristinsson.
