Ívar Örn Hansen, Helvítis kokkurinn, og Þórey Hafliðadóttir mæta á Kaffi Rauðku á Siglufirði með pizzur og sultur á Föstudaginn langa.
Helvítis kokkurinn leggur land undir fót um páskana og heldur norður á Siglufjörð þar sem hann mun standa fyrir sérstökum pizza pop-up viðburði á Kaffi Rauðku á Föstudaginn langa. Með honum í för er eiginkona hans, Þórey Hafliðadóttir eigandi Helvítis ehf., og saman hyggjast þau bjóða gestum upp á bæði nýja og kunnuglega bragðupplifun.
Viðburðurinn fer fram milli klukkan 15 og 21, þar sem hefðbundinn matseðill Kaffi Rauðku verður í boði samhliða sérsniðnum pizzum frá Helvítis kokkinum. Að sögn Ívars Arnar Hansen matreiðslumanns, sem flestir þekkja undir nafninu Helvítis kokkurinn, verður lögð áhersla á eldbakaðar pizzur og kröftuga bragðsamsetningu sem ætti að setja svip sinn á bæinn þann dag. Hann segir ljóst að Siglufjörður verði „flæðandi af ljúffengum eldbökuðum pizzum“ meðan á viðburðinum stendur.
Siglfirðingar fá tækifæri til að hitta Helvítis kokkinn, manninn á bak við vinsælar sultur sem hafa vakið athygli um land allt.
Samhliða pizzaveislunni verður einnig settur upp sölubás þar sem gestir geta smakkað og keypt Helvítis sultur á sérstöku verði. Þórey segir þau alltaf taka vel í slíkar fyrirspurnir um samstarf og bæti við að sérstaklega gaman sé þegar tækifæri gefist til að ferðast út fyrir höfuðborgarsvæðið.
„Það er náttúrulega ekki verra þegar við getum farið á svona fallega staði,“
segir hún í samtali við trolli.is.
Ferðin norður verður þó ekki einungis bundin við Siglufjörð. Á Skírdag munu þau einnig vera með kynningu í Krónunni á Akureyri frá klukkan 14 til 18. Þar gefst gestum kostur á að smakka nýjustu viðbótina í vörulínunni, Helvítis jarðarberjasultu með svörtum pipar, sem verður í fyrsta sinn kynnt á Norðurlandi, auk annarra sulta frá fyrirtækinu.
Þau hvetja sem flesta til að líta við á báðum stöðum yfir páskana og kynnast vörunum. Að þeirra sögn er ekkert skemmtilegra en að hitta fólk og deila með því því sem þau hafa verið að skapa.
Heimasíða: helvitis.is
Myndir: Veronika Guls
