Á bóndadaginn 24. janúar var haldið þorrablót Íslendinga sem dveljast á Gran Canaria til lengri eða skemmri tíma á veitingastaðnum Why Not Lago í Maspalomas.
Góð þátttaka var og varð uppselt á blótið, en um 220 manns komu og blótuðu þorrann saman.
Veisluborðið svignaði undan kræsingum og sá matreiðslumeistarinn Kristján Örn Frederiksen um eldamennsku og framsetningu á lostætinu ásamt úrvals starfsfólki úr eldhúsi.
Mikinn undirbúning og útsjónasemi þarf til að halda þorrablót af þessari stærð og fagmennsku fjarri heimahögum, panta þarf súr- og nýmeti frá Íslandi og kom hráefnið meðal annars frá Kjarnafæði og Norðlenska.
Fjöldasöngur var yfir borðhaldi, minni karla og kvenna, happadrætti var í boði hússins með veglegum vinningum og síðan var dansað eins og enginn væri morgundagurinn.
Guðbjörg Bjarnadóttir rekur veitingahúsið Why Not Lago með miklum myndarbrag og skipulagði hún viðburðinn ásamt því að halda happadrætti og sjá um söng á ballinu. Veislustjóri var Sigþór Gunnarsson frá Þingeyri og um tónlist sá Pétur Hreinsson sem þekktur er fyrir að hafa spilað með hljómsveitinni Hafrót.
Borðahald gekk mjög vel og hratt fyrir sig og er það mál manna að hér hafi glimrandi skemmtilegt þorrablót verið haldið.
Þess má geta að nokkrir Siglfirðingar mættu galvaskir á þorrablótið og voru fagnaðarfundir með þeim.
Fengum að fylgjast með undirbúningi þorrablótsins og eins og sjá má á myndunum voru ófá handtök á bakvið kræsingarnar. Myndirnar tók matreiðslumeistarinn Kristján Örn Frederiksen.
