Ljóðasetur Íslands á Siglufirði tók á móti tveimur frábærum nemendahópum úr Grunnskóla Fjallabyggðar í gær og líf og gleði fylltu setrið frá morgni og fram eftir degi. Fyrst mætti 2. bekkur og naut fræðslu þar sem áherslan var á ljóð um árstíðirnar að ósk kennara.
Nemendur hlýddu á ljóð og lög sem tengdust íslensku veðrafari og árstíðarhringnum og fengu jafnframt innsýn í ljóðform og íslenska bragfræði þar sem taktur og hrynjandi ljóða voru kynnt á lifandi hátt.
Á eftir tók við heimsókn 3. bekkjar sem fékk sambærilega dagskrá. Í þetta sinn var viðfangsefnið náttúruljóð og hlaut Fjallgangan eftir Tómas Guðmundsson sérstaklega góðar undirtektir enda er ljóðið hluti af námsefni bekkjarins um þessar mundir. Nemendur sögðu frá eigin upplifun af því að læra ljóð utanbókar sem starfsfólki setursins þótti sérlega ánægjulegt að heyra. Slík þjálfun efli bæði minni og skilning á blæbrigðum íslenskrar tungu.
Að lokinni heimsókn fengu allir nemendur bókagjöf til að hafa með sér heim ásamt hvatningu um að lesa sem mest og rækta þannig bæði hug og orðaforða. Starfsfólk Ljóðaseturs Íslands þakkar nemendum og kennurum kærlega fyrir komuna og hlakkar til að fá þá aftur í heimsókn. Lestur er bestur og góð ljóðataka kveikir auðveldlega ljóðagleði til framtíðar.
Myndir: Ljóðasetur Íslands
