Krónan og Skíðafélag Siglufjarðar Skíðaborg (SSS) stóðu fyrir svokölluðu Stubbamóti í lok febrúar á Skíðasvæði Siglufjarðar í Skarðsdal. Um var að ræða skemmtilegt og vel heppnað mót sem sérstaklega var ætlað yngstu kynslóð skíðaiðkenda, þar sem gleði, þátttaka og góð stemning voru í forgrunni.
Mótið fór fram á neðra lyftusvæðinu þar sem keppt var í svonefndri Stubbabraut. Keppendur fóru tvær umferðir í brautinni og fengu þannig tækifæri til að bæta tímann sinn og njóta skíðagleðinnar til fulls. Fyrir allra yngstu iðkendurna var einnig útbúin styttri stubbabraut við töfrateppið, þannig að allir gátu tekið þátt á sínum forsendum og upplifað gleðina sem fylgir því að renna sér niður brekkurnar.
Mótið var vel sótt og ljóst að mikill áhugi er meðal barna og fjölskyldna á skíðaíþróttinni á Siglufirði. Slík mót gegna mikilvægu hlutverki í að kynna yngstu iðkendunum íþróttina og skapa jákvæðar minningar á snjónum.
Með fréttinni fylgja myndir frá mótinu sem ljósmyndarinn Karolina Rudnik tók. Myndirnar hafa einnig verið birtar á Facebook-síðu Skíðafélags Siglufjarðar Skíðaborgar, auk myndbands sem gefur góða innsýn í stemninguna sem ríkti á mótsdag.
