Siglufjörður naut kórtónlistar þegar Karlakór Fjallabyggðar og kór Langholtskirkju sameinuðu krafta sína
Sameiginlegir tónleikar Karlakórs Fjallabyggðar og kórs Langholtskirkju fóru fram í Bátahúsinu við Síldarminjasafnið á Siglufirði síðastliðinn laugardag, 24. maí. Þar sameinuðu kórarnir krafta sína og buðu gestum upp á fjölbreytta og áhrifaríka tónlistarupplifun í einstöku og sögulegu umhverfi.
Undirbúningur dagsins hófst með æfingum kóranna, þar sem kór Langholtskirkju æfði í Tónskólanum á Siglufirði, á meðan Karlakór Fjallabyggðar hélt sína æfingu í brugghúsinu Segull 67. Sameiginleg æfing fór svo fram í Tónskólanum og lagði grunn að samstilltum og fallegum flutningi kvöldsins.
Tónleikarnir hófust klukkan 18:00 og var aðgangur ókeypis. Salurinn í Bátahúsinu var þéttsetinn og gleðin mikil. Það var ekki annað að sjá en að gestir væru ánægðir, enda naut tónlistarflutningurinn mikillar virðingar og hlýhugur ríkti í salnum.
Á efnisskránni voru fjölbreytt lög, og í lok tónleikanna sameinuðust kórarnir í sameiginlegum flutningi þriggja laga. Að lokum var flutt uppklappslagið „Siglufjörður“, með lagi og texta eftir Bjarka Árnason, sem vakti mikla hrifningu áheyrenda og var afar vel tekið.
Að tónleikunum loknum færði Edda Björk Jónsdóttir, kórstjóri Karlakórs Fjallabyggðar, Magnúsi Ragnarssyni, kórstjóra kórs Langholtskirkju, tvær vínilplötur með Karlakórnum Vísi. Sá kór starfaði á Siglufirði áratugum saman og hafði djúpstæð áhrif á tónlistarlíf bæjarins í nærri sextíu ár.
Tónleikarnir í Bátahúsinu voru sannkölluð hátíð tónlistar og samveru og sýndu svo ekki verður um villst hversu mikilvægur þáttur kórstarfsemi er í menningu og samfélagi þjóðarinnar.
Þar með lauk vetrarstarfi Karlakórs Fjallabyggðar með glæsilegum hætti.
Myndir/aðsendar
