Frábær árangur náðist hjá íslenskum keppendum á Heimsmeistaramóti unglinga í alpagreinum sem fram fór í Narvík í Noregi dagana 5. til 15. mars. Sérstaklega vekur athygli árangur Matthíasar Kristinssonar frá Skíðafélagi Ólafsfjarðar sem skrifar nafn sitt í sögubækurnar.
Í tilkynningu frá Skíðasambandi Íslands segir að
„bestum árangri íslensku keppendanna náði Matthías Kristinsson, Skíðafélagi Ólafsfjarðar, þegar hann varð í 11. sæti í svigi, aðeins 1,34 sekúndum á eftir sigurvegaranum Giuliano Fux frá Sviss.“
Þetta er jafnframt besti árangur íslendings frá upphafi á mótinu og því stórt skref fyrir íslenskar alpagreinar.
Matthías lét ekki þar við sitja því hann var einnig á meðal fremstu Íslendinga í stórsvigi þar sem hann endaði í 33. sæti með rásnúmer 53. Ásamt Bjarna Þór Haukssyni úr Víkingi, sem varð í 30. sæti, náðist besti árangur Íslendinga í stórsvigi á mótinu í yfir aldarfjórðung.
Aðrir íslenskir keppendur stóðu sig einnig vel. Í svigi karla varð Bjarni Þór í 27. sæti og bætti sig um fjögur sæti á milli ferða. Í kvennaflokki urðu Elín Van Pelt í 31. sæti, Sara Mjöll Jóhannsdóttir í 32. sæti og Sonja Lí Kristinsdóttir í 34. sæti. Nokkrir keppendur náðu ekki að ljúka báðum ferðum en sýndu engu að síður góða takta.
Í tilkynningunni er einnig rifjað upp að
„bestan árangur í stórsvigi á Heimsmeistaramóti unglinga á Björgvin Björgvinsson frá Dalvík þegar hann lenti í 12. sæti árið 1998,“
sem undirstrikar hversu merkilegur árangur Matthíasar er í sögulegu samhengi.
Átta íslenskir keppendur tóku þátt í mótinu og kepptu í bæði svigi og stórsvigi. Með árangri sínum hefur Matthías Kristinsson ekki aðeins sett ný viðmið fyrir íslenska skíðamenn heldur einnig vakið verðskuldaða athygli á því öfluga starfi sem unnið er í Ólafsfirði.
Myndband sýnir Matthías í keppni á mótinu í Narvík.
Mynd: ski.is
