Leikfélag Fjallabyggðar setur á svið gamanleikinn Með vífið í lúkunum á næstunni eftir breska leikskáldið Ray Cooney í Tjarnarborg í Ólafsfirði. Um er að ræða eitt þekktasta verk höfundarins, sem hefur um árabil verið talinn meðal fremstu meistara farsans í bresku leikhúsi.
Verkið er þekkt fyrir hraða og kraftmikla framvindu þar sem nákvæm tímasetning, snörp samtöl og sífellt flóknari atburðarás halda áhorfendum í spennu frá upphafi til enda. Misskilningur, leyndarmál og óvæntar vendingar fléttast saman á skemmtilegan hátt og skapa þá sérstöku stemningu sem farsinn byggir á.
Sýningar fara fram í Tjarnarborg í Ólafsfirði og hefjast allar klukkan 20:00. Frumsýnt verður 27. mars og verða frekari sýningar 29. og 31. mars, auk 2., 7. og 9. apríl.
Miðaverð er 4.000 krónur og hægt er að panta miða í síma, annars vegar hjá Kamillu í síma 865-0967 og hins vegar hjá Vibekku í síma 849-5384.
Ljóst er að hér er á ferðinni lífleg og skemmtileg uppfærsla á sígildu verki sem hefur glatt leikhúsgesti víða um heim og má því búast við góðri stemningu í Tjarnarborg á komandi vikum.
Tengt efni:
Æfingar hafnar á leikritinu „Með vífið í lúkunum“ hjá Leikfélagi Fjallabyggðar
Myndir: Leikfélag Fjallabyggðar
