Gengur sína 35. Vasagöngu í dag
Fljótamaðurinn Magnús Eiríksson skíðagöngumaður gengur í dag sína 35. Vasagöngu í Svíþjóð.
Magnús fór sína fyrstu göngu árið 1997 og hefur tekið þátt árlega síðan. Auk hefðbundinnar þátttöku hefur hann einnig gengið svonefndar aukagöngur og eru göngurnar því orðnar 35 talsins, samtals um 3.150 kílómetrar. Árið 2023 gekk hann þrjár Vasagöngur á einni viku; þá fyrstu á sunnudegi, aðra á mánudegi og þá þriðju aftur á sunnudegi.
Eini Íslendingurinn með heiðurstitillinn „Vasaloppsveteran“
Mánudaginn 23. febrúar síðastliðinn gengu þau hjónin Magnús og Guðrún Pálsdóttir saman í Vasagöngunni. Þá gekk Magnús þrítugasta árið í röð og hlaut við það heiðurstitilinn Vasaloppsveteran, sem telst eitt virtasta heiðursmerki sem hægt er að öðlast innan keppninnar. Hann er eini Íslendingurinn sem hlotið hefur heiðurstitilinn.
Þau eru elstu Íslendingarnir sem lokið hafa göngunni, Magnús er á sjötugasta og fimmta aldursári og Guðrún að verða sjötíu og eins.
Lauk Vasagöngu átta mánuðum eftir krabbameinsmeðferð
Siglfirðingurinn Guðrún Pálsdóttir gekk sína sjöundu göngu og telst það mikið afrek að þessu sinni. Guðrún greindist með krabbamein árið 2024 og lauk krefjandi meðferð fyrir um átta mánuðum síðan.
Aðspurð sagði hún við Trölla.is að fyrstu 60 kílómetrana hefði gangan verið létt en farið að þyngjast eftir það. Síðustu kílómetrana hafi hún farið skref fyrir skref og náð í mark á 11 klukkustundum og 46 mínútum.
Hjónin dvöldu í bænum Vecindario á Gran Canaria í þrjá mánuði í vetur og komu heim í janúar s.l. Þar nýttu þau tímann til daglegra æfinga á hjólaskíðum og vakti það mikla athygli heimamanna.
Vasagangan er einn stærsti þolraunaviðburður skíðagönguíþróttarinnar á heimsvísu
Vasagangan (Vasaloppet) er ein þekktasta og fjölmennasta skíðagöngukeppni heims. Hún fer árlega fram í Svíþjóð og liggur 90 kílómetra leið frá Sälen til Mora í héraðinu Dalarna. Keppnin er opin bæði atvinnu- og áhugafólki og taka þúsundir þátttakenda þátt á hverju ári.
Vasagangan var fyrst haldin árið 1922 og byggir á sögulegri frásögn um flótta sænska þjóðarleiðtogans Gústafs Vasa árið 1521. Leiðin sem keppnin fylgir á að minna á ferð hans um svæðið á tímum uppreisnar gegn dönsku yfirráði.
Keppnin er hápunktur svonefndrar Vasaloppet-viku, þar sem haldnar eru fleiri skíðagöngur á mismunandi vegalengdum. Aðalkeppnin, 90 kílómetra Vasagangan, er þó sú virtasta og er talin einn stærsti þolraunaviðburður skíðagönguíþróttarinnar á heimsvísu.
Titillinn „Vasaloppsveteran“ telst eitt virtasta heiðursmerki sem hægt er að öðlast innan keppninnar
Í sænsku skíðagöngunni Vasaloppet er hugtakið „veteran“ ekki tengt aldri heldur reynslu. Sá sem hefur lokið hinni 90 kílómetra löngu aðalkeppni þrjátíu sinnum telst Vasaloppsveteran og hlýtur sérstaka viðurkenningu frá skipuleggjendum.
Til að hljóta titilinn þarf viðkomandi að hafa farið alla leiðina milli Sälen og Mora þrjátíu sinnum. Styttri vegalengdir innan hátíðarinnar teljast ekki með. Ekki skiptir máli hversu langt líður á milli ganga; heildarfjöldi lokinna ferða ræður úrslitum.
Vasaloppsveteranar njóta mikillar virðingar innan samfélagsins enda felast í þrjátíu loknum göngum: áratugalöng þjálfun, úthald og elja. Þeir sem ná þessum áfanga fá heiðursviðurkenningu og eru skráðir í sérstaka “veteranaskrá” keppninnar.
Vasaloppet er ein þekktasta og fjölmennasta skíðaganga heims. Aðalkeppnin er 90 kílómetra löng og fer árlega fram í mars í Svíþjóð.
Í september verður haldin hátíð í Svíþjóð til að heiðra þá sem náð hafa þessum áfanga á árinu. Magnús gengur hér eftir með það númer sem hann fær þegar hann tekur þátt í göngunni á næsta ári.
