Pönnusteiktur þorskur með sætum kartöflubátum og basilíkumajónesi
- 900 gr þorskur
- 5 kúfaðar matskeiðar af hveiti
- 2 egg
- 150 gr brauðrasp
- 1-2 pressuð hvítlauksrif
- nokkrir stönglar af fersku rósmarín
- Sítróna, skorin í báta
Sætir kartöflubátar
- 2 stórar eða 4-5 litlar sætar kartöflur
- 1-1,5 tsk reykt paprika
- salt
- pipar
- ólívuolía
Basilíkumajónes
- 4 basilíkustönglar
- maldonsalt
- 2 kúfaðar matskeiðar majónes (Hellmans Light)
- safi af 1/2 sítrónu
Hitið ofninn í 200°. Skrúbbið eða afhýðið sætu kartöflurnar og skerið þær á lengdina í 8 báta. Leggið bátana í eldfast mót og veltið þeim upp úr ólívuolíu og kryddunum. Bakið í ofninum í 35-40 mínútur.
Takið fram 3 skálar. Setjið hveiti í fyrstu skálina og kryddið með salti og pipar (ég notaði Jamie Oliver saltið með sítrónu og timjan, mjög gott). Hrærið eggin og setjið í aðra skálina. Í þriðju skálina setjið þið brauðraspinn. Veltið nú þorskbitunum fyrst upp úr hveitiblöndunni, síðan hrærðu eggjunum og að lokum brauðraspinum.
Hitið ólívuolíuna við miðlungshita á pönnu og bætið hvítlauknum og rósmaríngreinunum í olíuna. Þetta er gert til að bragðbæta olíuna. Þegar hvítlaukurinn byrjar að krauma er þorsknum bætt á pönnuna. Steikið þorskinn í nokkrar mínútur á hvorri hlið, þar til hann fær fallegan lit.
Fjarlægið stöngulinn frá basilíkulaufunum og leggið laufin í mortel ásamt maldonsalti. Notið mortelið til að mauka laufin. Bætið majónesi og sítrónusafa út í og blandið vel.
Uppskrift: Ljúfmeti og lekkerheit
