Réttað var í Hamarsrétt á Vatnsnesi, laugardaginn 14. september. Ólafur Sveinn Guðmundsson Matreiðslumeistari var á ferðinni í Húnaþingi um helgina og tók þessar skemmtilegu myndir frá Hamarsrétt.
Hamarsrétt. Mynd/Ólafur Sveinn Guðmundsson
Hamarsrétt er í fjörunni rétt sunnan við ós Hamarsár á vestanverðu Vatnsnesi. Réttarstæði Hamarsréttar er talið eitt hið sérstæðasta á Íslandi.
Norðan við ós Hamarsár er lítið félagsheimili sem heitir Hamarsbúð.
Hamarsrétt. Mynd/Ólafur Sveinn Guðmundsson
Á síðunni VISITHUNATHING segir um Hamarsrétt.
Hamarsrétt stendur á einstökum stað í fjörukambinum á vestanverðu Vatnsnesi. Réttin er notuð á haustin þegar bændur á Vatnsnesi rétta fé sitt sem þeir smala saman úr fjallinu. Sunnan við Hamarsrétt er Hamarinn, klettaberg sem fengið hefur nafnið Kallhamar, tilkomið vegna þess að á árum áður var mikið útræði frá Vatnsnesi og þegar koma þurfti boðum til báta á sjó var farið fram á hamarinn og gefið merki eða kallað til nærliggjandi báta. Sunnan við Hamarinn má enn finna rústir frá sjóbúðum og útræði sem þar var mikið. Litlu norðan við fjárréttina stendur Hamarsbúð, félagsheimili húsfreyjanna á Vatnsnesi. Þar halda þær sína árlegu sumarhátíð, Bjartar nætur og bjóða uppá mikið Fjöruhlaðborð sem svignar af fjölda kræsinga og sjaldséðum mat, sem byggir á gömlum hefðum og hráefni úr sjó og af landi á Vatnsnesi.
Myndir: Ólafur Sveinn Guðmundsson
