-
- Í bakgrunni má sjá hvernig Bás sinnir snjómokstri af miklum dugnaði á Siglufirði og tryggir góða færð á göngustígum.
-
- Fuglalífið lætur sitt ekki eftir liggja og setur svip sinn á vetrarstemninguna.
Gönguhópar á vegum Hátindar 60+ eru fastur liður í vikurútínu fjölmargra íbúa á Ólafsfirði og Siglufirði. Á miðvikudögum er lagt af stað klukkan 10:30 á Ólafsfirði frá Húsi eldri borgara og klukkan 11:15 á Siglufirði frá Ráðhúsinu. Ferðirnar einkennast af hreyfingu, samveru og góðri stemningu. Þetta kemur fram í færslu Hátindar 60+ á Facebook, þar sem jafnframt fylgja með myndir.
Eins og sjá má á meðfylgjandi myndum láta þátttakendur ekki veður eða færð stoppa sig og eru göngurnar stundaðar í öllum aðstæðum. Þrátt fyrir snjóþunga hafa göngustígar verið vel færir og á það ekki síst að þakka snyrtilegum og samviskusömum snjómokstri. Þar á verktakafyrirtækið Bás sérstakar þakkir skildar fyrir vinnu sína á Siglufirði, sem auðveldar göngufólki að halda sinni rútínu óháð veðri og færð.
Auk gönguhópanna býður Hátindur 60+ upp á innigöngu í íþróttahúsum. Á Siglufirði er opið á mánudögum, þriðjudögum og fimmtudögum frá klukkan 11:00 til 12:00 og á Ólafsfirði á þriðjudögum og fimmtudögum á sama tíma. Þar gefst þátttakendum kostur á hreyfingu í hlýju og öruggu umhverfi, með áherslu á vellíðan og félagskap.
Starf Hátindar 60+ sýnir glöggt hversu miklu máli skipta regluleg hreyfing og samvera, ekki síst yfir vetrarmánuðina, þar sem bæði útivera og innanhússhreyfing stuðla að betri heilsu og aukinni lífsgleði.
