Þegar páskabjórarnir taka að fylla hillur verslana víða um land er ljóst að samkeppnin er hörð. Í ár lætur Segull 67 Brugghús ekki sitt eftir liggja og tekur þátt í páskaúrvalinu með sínum árstíðabundna bjór.
Brugghúsið á Siglufirði hefur á undanförnum árum skapað sér skýra sérstöðu með handverksbruggi sem sækir innblástur í norðlenskt hráefni og staðbundna sögu. Páskabjórinn frá Segli 67 er engin undantekning.
Samkvæmt upplýsingum á vinbudin.is eru tveir páskabjórar frá Segull 67 Brugghús í boði í ár.
Annars vegar er það Segull 67 Skíðastubbur páskabjór. Um er að ræða ljósgylltan bjór sem er ósætur og léttur með lítilli beiskju.
Hins vegar er það Segull 67 Hérastubbur páskabjór, einnig ljósgylltur að lit. Sá er með vott af sætu og meðalfyllingu, með lítilli beiskju.
Með þessum tveimur útgáfum teflir Segull 67 fram ólíkum túlkunum á páskabjórnum, annars vegar léttari og þurrari kost og hins vegar örlítið sætari og með meiri fyllingu. Þar með leggur brugghúsið sitt af mörkum í páskaúrvali ársins og styrkir enn stöðu handverksbrugghúsa á árstíðamarkaðnum.
Þátttaka Seguls 67 í páskaúrvalinu undirstrikar þá grósku sem ríkir í íslenskri handverksbjórgerð. Smærri brugghús hafa á undanförnum árum aukið sýnileika sinn í árstíðabundnu framboði og bjóða neytendum upp á fjölbreyttari valkosti en áður.
Fyrir Norðlendinga er þetta jafnframt tækifæri til að velja heimabruggaðan kost á hátíðarborðið. Segull 67 sýnir með þátttöku sinni að litlu brugghúsin eru tilbúin að etja kappi við stærri framleiðendur þegar kemur að páskabjórnum.
Mynd: Facebook / Segull 67
