Um árabil hefur Menntaskólinn á Tröllaskaga átt í farsælu og metnaðarfullu samstarfi við skólann New College Lanarkshire í Skotlandi. Samstarfið á rætur sínar að rekja til Ecomedia Evrópuráðstefnu í Rúmeníu árið 2016, þar sem kastljósinu var beint að upplýsingatækni í skólastarfi og nýsköpun í kennsluháttum.
Í kjölfarið sóttu kennarar MTR ráðstefnu til kollega sinna í Skotlandi og síðar komu fulltrúar NCL til Íslands þegar sambærileg Evrópuráðstefna var haldin hjá MTR. Tengslin hafa því styrkst jafnt og þétt á vettvangi kennara og stjórnenda. Þegar aðstoðarskólameistara MTR og einum kennara var boðið að sækja ráðstefnu hjá NCL á síðasta ári kviknuðu nýjar hugmyndir um að færa samstarfið yfir á nýtt stig og virkja nemendur með markvissari hætti.
Rafíþróttir brúa bilið milli landa
Fyrstu drög að slíku nemendasamstarfi litu dagsins ljós á dögunum þegar rafíþróttalið MTR var skorað á hólm af tveimur liðum frá NCL í leiknum Rocket League. Úr urðu tvær líflegar og skemmtilegar viðureignir þar sem ekki var til sparað. Leikirnir voru streymdir innan skoska skólans með kynnum og umgjörð sem minnti um margt á hefðbundna keppnisútsendingu.
Lið MTR hafði betur í báðum viðureignum, en úrslitin voru þó ekki aðalatriðið. Mikilvægast var að nemendur kynntust, mynduðu tengsl og fengu tækifæri til að takast á við jafningja sína erlendis í skipulögðu og jákvæðu umhverfi rafíþrótta. Markmiðinu var því náð, að efla samskipti og samvinnu þvert á landamæri með stafrænum lausnum.
Frekara samstarf er þegar í farvatninu og verður áhugavert að fylgjast með hvernig þessi vinabönd skólanna þróast á næstu misserum. Með rafíþróttum sem sameiginlegan vettvang virðist ljóst að fjarlægðir skipta sífellt minna máli þegar kemur að alþjóðlegu skólasamstarfi.
Myndir: mtr.is
