Frá og með 27. apríl 2021 gildir ný reglugerð nr. 435/2021 um sóttkví og einangrun og sýnatöku við landamæri Íslands vegna COVID-19. Ráðuneytið hefur tekið saman eftirfarandi spurningar og svör sem lúta að inntaki reglugerðarinnar og framkvæmd hennar: 

Hverjir teljast ferðamenn/farþegar?

Með ferðamanni/farþega er átt við hvaða einstakling sem er, sem ferðast milli landa, hvort sem hann er búsettur hér á landi eða erlendis. Eftirfarandi upplýsingar gilda því um alla sem koma til landsins. 

Hverjir þurfa að sæta sóttvarnaaðgerðum á landamærum?

Sóttvarnaaðgerðir á landamærum taka til allra sem koma frá löndum sem sóttvarnalæknir skilgreinir sem áhættusvæði.

Hvernig er ferlið þegar ég kem til landsins með flugi?

Flugfélög miðla upplýsingum til farþega sinna við brottför erlendis frá. Við komuna til landsins fara allir farþegar í sýnatöku í flugstöðinni. Að sýnatöku lokinni fá farþegar upplýsingar frá landamæraverði um næstu skref. 

Hvaðan telst ég koma ef ég millilendi á leið til landsins?

Millilending hefur því aðeins áhrif á skilgreiningu þess hvaðan þú telst koma ef þú hefur dvalið þar sólarhring eða lengur. 

Hverjir þurfa að fara í sýnatöku?

Allir sem koma til landsins frá skilgreindum áhættusvæðum þurfa að fara í sýnatöku á landamærum, á hvaða aldri sem þeir eru, líka þeir sem eru með bólusetningarvottorð eða vottorð um fyrra smit. Þeir sem eru með fyrrnefnd vottorð skulu fylgja reglum um sóttkví þar til neikvæð niðurstaða liggur fyrir úr sýnatöku. Sýnatakan er fólki að kostnaðarlausu. 

Hverjir þurfa að fara í sóttkví?

Allir sem koma til landsins frá skilgreindum áhættusvæðum þurfa að fara í sóttkví eftir skimun á landamærum og í aðra skimun að sóttkví lokinni nema þeir sem eru með gilt bólusetningarvottorð eða vottorð um fyrra smit. 

Þurfa börn að fara í sóttkví?

Börn fædd 2005 eða síðar fara í sýnatöku á landamærunum. Ferðist barn með einstaklingi sem skylt er að sæta sóttkví dvelur barnið þar með honum og losnar úr sóttkví ef síðara sýni úr samferðamanni er neikvætt. Ef samferðamaðurinn er undanþeginn sóttkví er barnið það sömuleiðis. Barn sem ferðast eitt þarf ekki að fara í sóttkví. 

Get ég valið að fara í sóttkví í sóttvarnahúsi?

Þeir sem ekki hafa tök á að vera í heimasóttkví og/eða kjósa frekar að dvelja í sóttvarnahúsi eiga kost á því. 

Hverjum er skylt að dvelja í sóttvarnahúsi?

Þeim sem koma frá skilgreindum hááhættusvæðum er skylt að dvelja í sóttkví í sóttvarnahúsi nema þeir geti framvísað vottorði um bólusetningu, vottorði um fyrri sýkingu eða vottorði um mótefni. 

Get ég fengið undanþágu frá skyldu til að dvelja í sóttkví í sóttvarnahúsi?

Sóttvarnalækni er heimilt að veita undanþágu frá skyldu að dvelja í sóttkví í sóttvarnahúsi ef ferðamaður sýnir fram á með fullnægjandi hætti að hann muni uppfylla öll skilyrði sóttkvíar í húsnæði á eigin vegum. Umsókn um undanþágu skal hafa borist sóttvarnalækni a.m.k. tveimur sólarhringum fyrir komu til landsins á netfangið sottkvi[hjá]landlaeknir.is. Aðeins þeir sem koma frá svæði eða landi þar sem 14 daga nýgengi smita er minna en 700 á hverja 100.000 íbúa geta sótt um undanþágu. 

Geta allir sótt um undanþágu frá sóttkví í sóttvarnahúsi?

Nei. Ekki er heimilt að veita slíka undanþágu til ferðamanns sem kemur frá eða hefur dvalið á svæði þar sem 14 daga nýgengi smita á hverja 100.000 íbúa er 700 eða meira eða fullnægjandi upplýsingar liggja ekki fyrir um landið eða svæðið, nema veigamiklar ástæður mæli með því, svo sem vegna fötlunar, þroska eða annarra sambærilegra aðstæðna umsækjanda. 

Kostar að dvelja í sóttvarnahúsi?

Nei. Dvölin í sóttvarnahúsi er viðkomandi að kostnaðarlausu. Þeim sem dvelja í sóttvarnahúsi verður gert kleift að njóta útiveru og sérstakt tillit verður tekið til barna, svo sem varðandi útiveru og annan aðbúnað. 

Hvað gerist ef einstaklingur brýtur reglur um heimasóttkví?

Þá getur sóttvarnalæknir ákveðið að viðkomandi ljúki sóttkví í sóttvarnahúsi. 

Þarf ég að panta mér gistingu vegna sóttkvíar í sóttvarnahúsi?

Nei, þeim sem ætla að vera í sóttkví í sóttvarnahúsi er leiðbeint á landamærunum um hvert þeir eiga að fara. 

Ef ég bý úti á landi, get ég dvalið eina nótt í sóttvarnahúsi áður en ég held í langferð heim til að ljúka þar sóttkví?

Já, en vinsamlega láttu landamæraverði vita að þú ætlir einungis að gista eina nótt áður en þú ferð frá landamærastöð. 

Hverjir geta verið í sóttkví í heimahúsi?

Allir sem þurfa að vera í sóttkví, og ekki er skylt að dvelja í sóttvarnahúsi, geta verið í henni í heimahúsi ef þar er hægt að uppfylla skilyrði og umgengnisreglur samkvæmt leiðbeiningum sóttvarnalæknis. Í því felst að einstaklingur skuli vera einn á dvalarstað en ef fleiri dveljast þar þurfa þeir að sæta öllum sömu skilyrðum sóttkvíar. Þeir sem ekki geta dvalið í heimasóttkví sem uppfyllir skilyrði sóttvarnalæknis þurfa að dvelja í sóttvarnahúsi. 

Er unnt að kæra ákvarðanir um sóttkví?

Já þær má bera undir héraðsdóm. Þeir sem þurfa að sæta sóttkví, hvort sem er í heimahúsi eða í sóttvarnahúsi, geta komið óánægju sinni á framfæri við sóttvarnalækni með því að senda tölvupóst á sottkvi[hjá]landlaeknir.is. Þar þarf að koma fram nafn, kennitala og heimilisfang sem og komudagur og tími til landsins og eftir atvikum ástæður þess að viðkomandi vill ekki sæta sóttkví. Í þeim tilvikum mun sóttvarnalæknir taka formlega ákvörðun um sóttkví, sbr. 14. gr. sóttvarnalaga nr. 19/1997. Ákvörðunina mun sóttvarnalæknir í kjölfarið bera undir héraðsdóm, sem mun skipa viðkomandi talsmann, sbr. 15. gr. sóttvarnalaga. Slíkur málarekstur er þeim sem sætir sóttkví að kostnaðarlausu. 

Er eftirlit með því að sóttvarnareglum sé fylgt?

Já, það er eftirlit með því að sóttvarnareglum sé fylgt. 

Eru sektir við brotum á reglum um sóttkví?

Já, það eru sektir fyrir brot á sóttkví.

Mynd/stjórnarráðið

173 Shares