Í dag, sunnudaginn 1. júní er sjómannadagurinn.
Sjómannadagurinn er fyrsti sunnudagurinn í júní ár hvert, nema ef hvítasunnu ber upp á þann dag, þá er hann næsti sunnudagur þar á eftir.
Hann er hátíðisdagur allra sjómanna. Dagurinn var fyrst haldinn hátíðlegur þann 6. júní árið 1938 í Reykjavík og á Ísafirði, frá upphafi 20. aldar tíðkaðist að halda sérstakar sjómannamessur í kirkjum áður en þilskipin héldu til veiða eftir vetrarlægi, sem var yfirleitt 3. eða 4. sunnudag eftir þrettánda.
Árið 1987 var dagurinn lögskipaður frídagur sjómanna.
Í Fjallabyggð er haldið upp á sjómannadaginn í Ólafsfirði með glæsilegri dagskrá. Á Siglufirði er lagður blómsvegur á minnisvarðann um týnda og drukknaða sjómenn og sjómenn heiðraðir. Í ár er sjómaðurinn Sigurður Örn Baldvinsson heiðraður.
Forsíðumyndin er tekin á sjómannadaginn á Siglufirði í kringum 1980. Hún er úr einkasafni Ásdísar Magneu Gunnlaugsdóttur og Sigurjóns Jóhannssonar skipstjóra.
