Hin árlega sviðamessa eldri borgara í Fjallabyggð fór fram í Skálarhlíð á Siglufirði nú á dögunum. Að venju var húsið þéttsetið og stemningin frábær, enda hefur þessi viðburður notið mikilla vinsælda ár eftir ár.
Gestum var boðið upp á rausnarlega veislu þar sem borðið var hlaðið sviðahausum með öllu tilheyrandi, þessu klassíska lostæti sem margir Íslendingar kannast við og kunna vel að meta. Hákon Sæmundsson matreiðslumaður og eigandi Fiskbúðar Fjallabyggðar sá um matseldina og lét ekki sitt eftir liggja. Gestir voru á einu máli um að maturinn hefði tekist afburðavel.
Skemmtiatriðin vöktu mikla kátínu og var boðið upp á söng, spjall og léttar uppákomur sem gerðu daginn enn ánægjulegri.
Myndir/ Félag eldri borgara á Siglufirði
