TBS-ingar á fullu með landsliðum Íslands í badminton

Það er nóg um að vera hjá landsliðum Badmintonsambands Íslands þessa dagana því þrjú landslið eru nú í verkefnum. Sérstaklega ánægjulegt er að þrír uppaldir iðkendur frá TBS, Tennis og Badmintonfélagi Siglufjarðar, taka þátt í þessum verkefnum.

Sebastían Amor Óskarsson er staddur á Evrópumeistaramótinu U17 á Lanzarote, einni af Kanaríeyjum við strendur Spánar, þar sem keppni hófst á laugardag og lýkur um helgina.

Systurnar Sólrún Anna og Hrafnhildur Edda Ingvarsdætur ferðuðust í gær til Þýskalands með kvennalandsliðinu sem tekur þátt í forkeppni EM í liðakeppni. Liðið leikur sinn fyrsta leik í dag og nánari upplýsingar má finna á Facebook-síðu Badmintonsambands Íslands.

Karlalandsliðið hóf einnig keppni í forkeppni EM í Tékklandi í gær og því ljóst að íslenskir landsliðsleikarar hafa haft nóg að gera að undanförnu.

Sólrún, Hrafnhildur og Sebastían eru glæsilegar fyrirmyndir yngri iðkenda TBS og endurspegla það öfluga íþróttastarf sem byggt hefur verið upp í Fjallabyggð.

Mynd: facebook / TBS – Tennis og Badmintonfélag Siglufjarðar