Jólaæfing Slökkviliðs Fjallabyggðar fór fram nýlega og jafnframt var þetta síðasta æfing ársins. Á þessum tíma ársins er gjarnan vikið frá hefðbundnum verkferlum og tekið upp efni sem reynir á slökkviliðsmenn á nýjan hátt. Áherslan beinist að því að efla færni, liðsheild og útsjónarsemi í ólíkum aðstæðum.
Eitt af því sem æft var þetta kvöldið var meðferð sérstaks björgunarbúnaðar sem notaður er við að klippa bíla og rústabjörgun, en verkefnið fólst þó í allt öðru en venjulegum aðstæðum. Slökkviliðsmaður fékk það verkefni að færa egg á milli staða með þessum þungum og öflugum tækjum, sem sýndi með skemmtilegum hætti hversu mikla nákvæmni og fínhreyfingar þarf að tileinka sér í störfum slökkviliðsins.
Á meðfylgjandi myndbandi má sjá hve leikandi létt hann framkvæmir þetta viðkvæma verkefni og undirstrikar það fagmennsku og þjálfun liðsmanna.
Mynd: skjáskot úr myndbandi
