Kynjajafnrétti fær fjölskyldur til að dafna (e. Gender Equality Makes Families Thrive) var yfirskrift pallborðsumræðna norrænna jafnréttisráðherra á sjötugasta fundi Kvennanefndar Sameinuðu þjóðanna (CSW70) í gær.
Þorbjörg S. Gunnlaugsdóttir, dómsmálaráðherra og ráðherra jafnréttismála, tók þátt í umræðunum fyrir Íslands hönd. Hún sagði meðal annars að mikilvægt væri að halda sögunni á lofti til þess að ungt fólk og komandi kynslóðir áttuðu sig á því að árangur Norðurlandanna í jafnréttismálum væri síður en svo sjálfsagður. Hún lagði áherslu á að Ísland hefði náð miklum árangri á fjölmörgum sviðum vegna aðgerða í jafnréttismálum.
„Jafnréttismál snúast ekki bara um jafnrétti. Jafnrétti hefur ekki aðeins áhrif á stöðu einstaklinga heldur bætir það hag fjölskyldna og stuðlar að efnahagslegri velmegun samfélaga. Þegar öllu er á botninn hvolft er jafnrétti efnahagsmál,“ sagði ráðherra.
Sjálfstæður réttur til fæðingarorlofs mikilvæg aðgerð
Í máli sínu lagði hún sérstaka áherslu á reynslu Íslands af sjálfstæðum rétti beggja foreldra til fæðingarorlofs. Samkvæmt lögum er hvoru foreldri tryggður sjálfstæður réttur til fæðingarorlofs í allt að sex mánaða, þar sem aðeins sex vikur eru framseljanlegar milli foreldra.
Þorbjörg S. Gunnlaugsdóttir dómsmálaráðherra
„Sjálfstæður réttur beggja foreldra til fæðingarorlofs hefur reynst gríðarlega áhrifarík aðgerð. Ef við viljum raunverulegt jafnrétti á vinnumarkaði verðum við að tryggja að ábyrgðin á fyrstu mánuðum barns sé sameiginleg. Þegar feður taka stærri þátt í fæðingarorlofi verður fjarvera foreldra frá vinnumarkaði jafnari og dregur úr þeirri hættu að konur sitji eftir í starfsþróun og tekjum.“
Auk Þorbjargar tóku þátt í umræðunum Lubna Jaffery, menningar- og jafnréttisráðherra Noregs, Sanni Grahn-Laasonen, velferðarráðherra Finnlands, Nina Larsson, jafnréttisráðherra Svíþjóðar, og Kira Appel, yfirmaður alþjóðamála í danska umhverfis- og jafnréttisráðuneytinu. Þær voru sammála um að reynsla Norðurlandanna sýndi skýrt að aðgerðir í þágu jafnréttis skiluðu ávinningi fyrir fjölskyldur og samfélög.
Í umræðunum kom einnig fram að stjórnvöld þyrftu að takast á við áskoranir á sviði upplýsingaóreiðu, gervigreindar, útbreiðslu íhaldssamrar hugmyndafræði, hatursorðræðu og áreitni á netmiðlum. Bregðast þyrfti við útbreiðslu íhaldssamrar hugmyndafræði meðal ungs fólks, leggja áherslu á vítt samráð við stefnumótun og fá karlmenn í ríkari mæli til liðs við jafnréttisbaráttuna.
Myndir: aðsendar
