Nanna Franklínsdóttir á Siglufirði er fjórða elsta konan hér á landi, hún varð 103 ára 12. maí síðastliðinn. Frá þessu segir á facebooksíðu Langlífis.
Segir þar að nú eru þrettán íbúar á Siglufirði níutíu ára eða eldri sem samsvarar 1,0% af íbúafjöldanum. Það er mun hærra hlutfall en á landinu í heild, sem er 0,6%.
Systurnar Nanna og Margrét Franklínsdætur úr Strandasýslu eru í fyrsta og þriðja sæti en í öðru sæti er Sigfúsína Stefánsdóttir en hún er elsti innfæddi Siglfirðingurinn.
Rúmlega helmingur hópsins, sjö af þrettán, fæddist á Siglufirði, fjórir eru fæddir í Skagafirði og tveir á Ströndum.
![](https://trolli.is/wp-content/uploads/2019/06/60594863_2519396004757459_3383206963818004480_o.jpg)
Mynd/Langlífi
Á Íslandi er Dóra Ólafsdóttir í Kópavogi allara kvenna elsta, 106 ára, en verður 107 ára í byrjun júlí. Aðeins fjórtán Íslendingar hafa náð hærri aldri en Dóra.
Guðný Jóna Þorbjörnsdóttir í Reykjavík og Sigrún Hjálmarsdóttir í Húnavatnssýslu eru í öðru og þriðja sæti, 103 ára, en verða 104 ára í september.
Alls eru 35 konur hundrað ára eða eldri. Um helmingur þeirra er með lögheimili í Reykjavík.
Eins og áður hefur komið fram hafa tíu núlifandi karlar náð hundrað ára aldri.
![](https://trolli.is/wp-content/uploads/2019/06/61638519_2538722332824826_5734834311522156544_o.jpg)
Mynd/Langlífi