Nemendur MTR og tíunda bekkjar Grunnskóla Fjallabyggðar fengu í gær góða heimsókn frá Geðfræðslufélaginu Hugrúnu sem hvetur til opinnar umræðu um geðheilbrigðismál og andlega líðan.
Góð geðheilsa skiptir alla máli og er undirstaða þess að njóta sín í daglegu lífi.
Hún veitir ákveðið jafnvægi en tryggir ekki stöðuga gleði og hamingju. Í fyrirlestrinum var lögð áhersla á hina heilögu þrenningu, svefn, næringu og hreyfingu ásamt meðvitund um líðan og tilfinningar.
Nemendur fengu góð ráð um hvert þeir geti leitað í vanda auk upplýsinga um hvernig hægt er að stuðla að góðri geðheilsu vina og vandamanna.
Að meðaltali lendir fólk í um þrjátíu atburðum um ævina sem geta haft afgerandi áhrif, svo sem ástvinamissi, sambandsslitum, slysi, greinist með sjúkdóm o.s.frv.
Geðheilsa er samofin annarri heilsu. Fólk fer á heilsugæslu eða sjúkrahús ef það meiðir sig, verður lasið eða lendir í slysi. Á sama hátt er rétt að leita strax til fagfólks ef geðheilsan versnar.
![](https://trolli.is/wp-content/uploads/2020/02/87488518_2521433321403097_10677250043150336_n-1024x1024.png)
Af vefsíðu Menntaskólans á Tröllaskaga MTR