Í gær stóð Björgunarsveitin Strákar á Siglufirði fyrir fjórum umfangsmiklum útkallsæfingum sem hófust klukkan níu um morguninn og stóðu fram yfir klukkan nítján um kvöldið.
Æfingarnar voru fjölbreyttar og reyndu á ólíka þætti björgunarstarfsins. Þar var meðal annars sviðsett bílvelta, tvær leitaræfingar og snjóflóðaæfing þar sem lögð var áhersla á skipulag, samhæfingu og skjót viðbrögð við krefjandi aðstæðum. Slíkar æfingar eru lykilþáttur í undirbúningi björgunarsveita og tryggja að viðbragðsaðilar séu ávallt reiðubúnir þegar raunveruleg útköll berast.
Deginum lauk með súpu og samveru hjá Slysavarnardeildinni Vörn, þar sem þátttakendur gátu farið yfir verkefni dagsins og styrkt tengslin enn frekar.
Strákar vilja koma á framfæri þökkum til þeirra sem komu að æfingunum, ekki síst Flugbjörgunarsveitarinnar í Reykjavík sem mætti norður til að æfa með sveitinni. Einnig tóku Björgunarsveitin á Dalvík, Björgunarsveitin Tindur og Svæðisstjórn svæðis 11 þátt í deginum og áttu sinn þátt í því að gera hann bæði lærdómsríkan og árangursríkan.
Með æfingum sem þessum er grunnur lagður að öflugu og samhæfðu björgunarstarfi á Norðurlandi, þar sem samvinna og fagmennska skipta sköpum þegar mest á reynir.
Myndir: Facebook / Björgunarsveitin Strákar
