Nemastofa atvinnulífsins var formlega stofnuð í gær, þriðjudaginn 5. apríl kl. 12 í húsnæði IÐUNNAR fræðsluseturs að viðstöddum mennta- og barnamálaráðherra Ásmundi Einari Daðasyni, fulltrúum úr atvinnulífi og skólameisturum framhaldsskóla.
Nemastofa atvinnulífsins er samstarfsvettvangur samtaka í atvinnulífinu um bætt vinnustaðanám og fjölgun faglærðs starfsfólks. Markmið með Nemastofu atvinnulífsins er að fjölga fyrirtækjum og iðnmeisturum sem taka nema á vinnustaðanámssamning. Með tilkomu Nemastofu atvinnulífsins eykst yfirsýn yfir fjölda nemenda í vinnustaðanámi auk þess sem aðgengi nemenda að starfsnámi verður bætt og einfaldað.
Ásmundur Einar Daðason mennta- og barnamálaráðherra, Hildur Elín Vignir framkvæmdastjóri IÐUNNAR fræðsluseturs og Þór Pálsson framkvæmdastjóri RAFMENNTAR undirrituðu samkomulag um sérstakt átaksverkefni sem miðar m.a. að því að fjölga fyrirtækjum á birtingaskrá.
Samhliða stofnun Nemastofu atvinnulífsins var vefur hennar formlega opnaður: nemastofa.is.
Nemastofa atvinnulífsins veitti þremur fyrirtækjum hvatningaverðlaun sem hafa á liðnum árum náð góðum árangri í þjálfun og kennslu nema á vinnustað og eru góðar fyrirmyndir sem lærdómsfyrirtæki í viðkomandi faggreinum. Fyrirtækin sem hlutu hvatningarverðlaun árið 2022 voru: Gullsmíða- og skartgripaverslunin Tímadjásn, bílaumboðið BL og TG raf.
Upplýsingasíða mennta- og barnamálaráðuneytisins um vinnustaðanám og rafrænar ferilbækur
Mynd: stjornarradid.is
