Pálshús Ólafsfirði opnar, eftir vetrardvala, laugarsaginn 15. maí nk. kl. 14:00.
Á sama tíma opnar í sýningarsalnum listamaðurinn Pétur Magnússon með fjölbreytta og áhugaverða sýningu. Sýning Péturs stendur til 24. júní í sumar.
Þann 26. júní nk. opnar svo Hulda Hákon sýningu sína í salnum. Verður auglýst þegar nær dregur.
Helga Pálína Brynjólfsdóttir opnar svo sýningu 1. ágúst nk. Verður auglýst þegar nær dregur.
Pétur Magnússon
Pétur Magnússon fæddist í Reykjavík árið 1958. Eftir menntaskóla fór hann í Myndlista- og handíðaskóla Íslands og síðan áfram á Accademia delle belle Arti í Bologna, Ítalíu og að lokum í Rijksakademie van Beeldende Kunsten í Amsterdam, Hollandi. Að loknu námi árið 1986 var hann búsettur í Amsterdam til ársins 2003, en flutti þá til Íslands. Í Hollandi tók hann þátt í stofnun listaverkabókabúðarinnar “Boekie Woekie” sem jafnframt er gallerí og útgefandi. Hann starfaði með fyrirtækinu fyrstu árin. Boekie Woekie kynnti síðan verk hans á “Art Frankfurt” listamessunni í Þýskalandi árið 1996. Pétur lærði málun á Ítalíu og grafík í Hollandi og eldri verk hans bera þess merki. Með tímanum hefur hann fært sig yfir í ljósmyndir og skúlptúr, oft lágmyndir og einkennast aðferðir hans oft á blöndu af stálsmíði og ljósmyndun. Verk hans láta reyna á skynjunina og ögra henni meðan þau bjóða upp á nýja möguleika til að skynja umhverfið. Verkin eru oftar en ekki háð sýningarrýminu (site specific). Efni og fjarvídd spila oft stórt hlutverk í að eiga við umhverfið á heimspekilegan og skoplegan máta.
Sjá einnig peturmagnusson.is
Forsíðumynd: Frá sýningu fyrir forystufé í Sandfellshaga . Verk í vinnslu
