Í tilefni Eyfirska safnadagsins þann 25. apríl – á sumardaginn fyrsta, fer fram áhugaverður fyrirlestur í Gránu, bræðsluhúsi Síldarminjasafnsins kl. 14:00.

Margrét Guðmundsdóttir sagnfræðingur ætlar í erindi sínu að rjúfa skarð í þann þagnarmúr sem hlaðinn er um sögu verkakvenna. Þætti þeirra í verðmætasköpun í sjávarútvegi er sjaldan gefinn verðugur gaumur – stundum mætti jafnvel ætla að saltfiskur og söltuð síld í tunnum væru dregin úr sjónum.

Síldarsöltun er iðulega kennd við ævintýri. Rómantík, söngur, dans og harmonikutónar leika þar aðalhlutverkin. Hvernig kemur sú mynd heim og saman við raunveruleika hversdagsins í vinnslu á silfri hafsins?

Sögur úr síldinni eru margar – en sárafáar frásagnir kvenna hafa því miður ratað á prent.

Áheyrendum verður boðið að fylgja síldarstúlkum með togara frá Reykjavík norður til Hjalteyrar. Hugað verður að undirbúningi þeirra fyrir vertíðina, ferðalagið og útlegðina. Litið verður inn um gættina á verbúðum verkakvenna og brugðið upp mynd af aðbúnað þeirra og sambúð. Kostur síldarstúlkna og vinnufatnaður verður gaumgæfður og drepið á þvotta, þrifnað og heilsufar. Áhugasömum hlustendum verður að sjálfsögu boðið að slást í för með verkakonum á söltunarplanið.

Þórarinn Hjartarson „syngjandi sagnfræðingur“ mun fylgja Margréti og bresta í söng undir lestri konu sinnar.

Enginn aðgangseyrir – allir velkomnir!

Sjá vefsíðu safnsins: http://www.sild.is/frettir/farandverkakonur-vid-sildarsoltun-a-hjalteyri-1915

 

Umsagnir eru á ábyrgð þess sem ritar - Trölli áskilur sér rétt til að eyða óviðeigandi ummælum.