Presturinn og rithöfundurinn sr. Sigurður Ægisson hefur sent frá sér sína fyrstu barnabók, sem ber heitið Ævintýraheimur íslenskra fugla 1.
Bókin er hlýr og fræðandi leiðarvísir inn í líf fuglanna sem við sjáum allt í kringum okkur – á túnum, við sjóinn og í ferskvatni – fuglanna sem syngja, verpa og fljúga yfir Ísland allt árið um kring.
„Við hlustum á sögur fuglanna, skoðum hvernig þeir líta út og hvað þeir gera dagsdaglega,“ segir á baksíðu bókarinnar, þar sem börn eru hvött til að kynnast náttúrunni í gegnum forvitni og leik.
Í bókinni kynnast lesendur 16 fuglategundum af þeim 75–80 sem verpa að staðaldri á Íslandi. Hún er ætluð lesendum á aldrinum 1–12 ára, jafnt yngri börnum og eldri sem vilja fræðast um íslenskt fuglalíf á lifandi hátt.
Í lok hvers kafla er ljóð sem börn alls staðar að af landinu hafa ort um fuglinn sinn.
Sr. Sigurður hefur á löngum ferli sínum skrifað fjölda bóka um íslenska fugla, þjóðtrú, náttúru og trúarbrögð, og hlotið lof fyrir að miðla flókinni þekkingu á hlýlegan og manneskjulegan hátt.
Tvær bóka hans hafa verið tilnefndar til Viðurkenningar Hagþenkis.
Helstu verk sr. Sigurðar Ægissonar:
- Ísfygla – íslenskir fuglar : Aves Islandicæ (1996)
- Íslenskir hvalir, fyrr og nú (1997)
- Íslenskar kynjaskepnur (2008) – tilnefnd til Viðurkenningar Hagþenkis
- Hvalir (2010)
- Íslensku fuglarnir og þjóðtrúin (2020) – tilnefnd til Viðurkenningar Hagþenkis
- Hrafninn – þjóðin, sagan, þjóðtrúin (2022)
- Völvur á Íslandi (2023)
- Ókei – leitin að upphafi og sögu þekktasta orðatiltækis í heimi (2024)
- Ævintýraheimur íslenskra fugla 1 (2025)
- Langt var róið og þungur sjór :
Líkön Njarðar S. Jóhannssonar af norðlenskum fiski- og hákarlaskipum og frásagnir af afdrifum þeirra (2025)
Ævintýraheimur íslenskra fugla 1 er fallega myndskreytt og höfðar jafnt til barna sem fullorðinna sem hafa gaman af íslenskri náttúru.
Í henni tekst sr. Sigurði, líkt og svo oft áður, að sameina fróðleik, trú og ást á íslenskum fuglum í hlýlega og ljóðræna frásögn.
📚 Ævintýraheimur íslenskra fugla 1 fæst nú í helstu bókabúðum landsins.
