Febrúar var fremur kaldur um land allt segir á vefsíðu Veðurstofu Íslands. Úrkomusamt var á Norður- og Austurlandi. Samgöngur riðluðust margoft vegna óveðurs. Versta veðrið var þ. 14. þegar mikið austanveður gekk yfir landið og bættist í hóp verstu illviðra síðustu ára. Mikið tjón hlaust af veðrinu einkum á Suðurlandi, Suðausturlandi og á Faxaflóasvæðinu þar sem veðrið var einna verst. Loftþrýstingur var óvenju lágur yfir landinu í febrúar.
Hiti
Meðalhiti í Reykjavík í febrúar var 0,3 stig og er það -0,1 undir meðallagi áranna 1961 til 1990, en -1,2 stigum undir meðallagi síðustu tíu ára. Á Akureyri var meðalhitinn -1,5 stig, -0,1 stigi undir meðallagi áranna 1961 til 1990, en -1,6 stigum undir meðallagi síðustu tíu ára. Í Stykkishólmi var meðalhitinn -0,2 stig og 1,1 stig á Höfn í Hornafirði.
Meðalhita og vik á fleiri stöðvum má sjá í töflu.
| stöð | meðalhiti °C | vik 1961-1990 °C | röð | af | vik 2010-2019 °C |
| Reykjavík | 0,3 | -0,1 | 60 | 150 | -1,2 |
| Stykkishólmur | -0,1 | 0,6 | 56 | 175 | -0,9 |
| Bolungarvík | -0,6 | 0,4 | 49 | 123 | -1,1 |
| Grímsey | -0,3 | 0,7 | 50 | 147 | -1,2 |
| Akureyri | -1,5 | -0,1 | 72 | 140 | -1,6 |
| Egilsstaðir | -1,8 | 0,1 | 35 | 66 | -1,8 |
| Dalatangi | 1,1 | 0,5 | 34 | 82 | -1,1 |
| Teigarhorn | 0,7 | 0,4 | 58 til 59 | 148 | -1,1 |
| Höfn í Hornaf. | 1,1 | -0,9 | |||
| Stórhöfði | 1,8 | -0,2 | 62 | 144 | -1,0 |
| Hveravellir | -6,0 | -0,1 | 31 | 56 | -1,6 |
| Árnes | -1,1 | -0,1 | 58 | 141 | -1,3 |
Meðalhiti og vik (°C) í febrúar 2020
Febrúar var kaldur og hiti var undir meðallagi síðustu tíu ára á landinu öllu. Neikvætt hitavik miðað við síðustu tíu ár var minnst -0,5 stig á Breiðadalsheiði en mest -2,0 stig í Möðrudal.
Hitavik sjálfvirkra stöðva í febrúar miðað við síðustu tíu ár (2010-2019).
Meðalhiti mánaðarins var hæstur 2,8 stig í Surtsey en lægstur -7,0 stig í Sátu. Í byggð var meðalhitinn lægstur -4,9 stig í Möðrudal.
Hæsti hiti mánaðarins mældist 17,0 stig á Kvískerjum þ. 5. Mest frost í mánuðinum mældist -28,1 stig við Mývatn þ. 13.
Úrkoma
Úrkomusamt var á Austur- og Norðurlandi í febrúar á meðan þurrara var á vestari hluta landsins.
Úrkoma í Reykjavík mældist 55,4 mm sem er um 80% af meðalúrkomu áranna 1961 til 1990. Á Akureyri mældist úrkoman 82,6 mm sem er nærri tvöfalt meiri úrkoma en að meðallagi 1961 til 1990. Í Stykkishólmi mældist úrkoman 46,8 mm og 169,4 mm á Höfn í Hornafirði.
Dagar þegar úrkoma mældist 1,0 mm eða meira í Reykjavík voru 11, tveimur færri en í meðalári. Á Akureyri mældist úrkoma 1,0 mm eða meiri 14 daga mánaðarins, 6 fleiri en í meðalári.
Snjór
Alhvítir dagar í Reykjavík voru 10, tveimur færri en að meðaltali 1971 til 2000. Á Akureyri voru alhvítir dagar 25 sem er 6 dögum fleiri en að meðaltali 1971 til 2000.
Sólskinsstundafjöldi
Í Reykjavík mældust sólskinsstundirnar 50,5 sem er 1,4 stundum færri en í meðallagi í febrúar. Sólskinsstundir voru fáar á Akureyri, 13,2 sem er 23 stundum færri en í meðalári.
Vindur
Vindur á landsvísu var 0,6 m/s yfir meðallagi. Austlægar áttir voru ríkjandi. Mánuðurinn var illviðrasamur og riðluðust samgöngur margoft vegna veðurs. Mikið austanveður gekk yfir landið þ. 14. og bættist í hóp verstu illviðra síðustu ára. Töluvert tjón hlaust af veðrinu einkum á Suðurlandi, Suðausturlandi og á Faxaflóasvæðinu þar sem veðrið var einna verst.
Loftþrýstingur
Loftþrýstingur var óvenju lágur í febrúar.
Meðalloftþrýstingur í Reykjavík mældist 981,9 hPa og er það 20,7 hPa undir meðallagi áranna 1961 til 1990. Mánaðarþrýstimeðaltalið hefur aðeins 5 sinnum verið lægri í febrúar síðustu 200 árin. Lægsta meðaltalið er frá 1990, 976,3 hPa.
Hæsti loftþrýstingur mánaðarins mældist 1013,8 hPa í Önundarhorni þ. 4. Lægstur mældist loftþrýstingurinn 932,3 í Surtsey þ. 15. Það er þriðji lægsti þrýstingur sem mælst hefur í febrúarmánuði, síðast var hann lægri 1989 þegar þrýstingur á Stórhöfða mældist 931,9 hPa.
Fyrstu tveir mánuðir ársins
Meðalhiti í Reykjavík var 0,3 stig sem er 0,4 stigum yfir meðallagi áranna 1961 til 1990 en 1,0 stigi undir meðallagi síðustu tíu ára. Meðalhitinn raðast í 53. sæti á lista 150 ára. Á Akureyri var meðalhiti mánaðanna tveggja -1,0 stig. Það er 0,9 stigum yfir meðallagi áranna 1961 til 1990, en 0,9 stigum neðan meðallags síðustu tíu ára. Meðalhitinn þar raðast í 46. til 47. sæti á lista 140 ára. Úrkoma hefur verið 20% umfram meðallag í Reykjavík, en um 65% umfram meðallag á Akureyri.
Skjöl fyrir febrúar
Meðalhiti á sjálfvirkum veðurstöðvum í febrúar 2020 (textaskjal).
Daglegt yfirlit mánaðarins á þremur ákveðnum veðurstöðvum er hægt að sækja í sérstaka töflu.
