FM Trölli og Trölli.is verða á hátíðinni “Eldur í Húnaþingi” sem hefst miðvikudaginn 25. júlí og stendur alla helgina. Við munum senda út beint frá ýmsum viðburðum hátíðarinnar, og fréttirnar á Trölli.is munu litast verulega af hátíðinni.
![](https://trolli.is/wp-content/uploads/2018/07/Screenshot-2018-07-23-21.49.52.png)
Eldur í Húnaþingi 2016 ( úr drónamyndskeiði )
Fyrir þá sem ekki vita, var “Eldurinn” fyrst tendraður 2003, svo þetta er í 16. skiptið sem hátíðin er haldin. Tilgangur hátíðarinnar er m.a. að efla menningu á staðnum og drífa unga fólkið af stað til að gera eitthvað skemmtilegt yfir sumarið. Á Hvammstanga hefur alltaf verið mikil gróska í menningu, sérstaklega tónlist og myndlist.
![](https://trolli.is/wp-content/uploads/2018/07/Screenshot-2018-07-23-21.53.08.png)
Loftmynd frá Eldinum 2016 ( úr drónamyndskeiði )
![](https://trolli.is/wp-content/uploads/2018/07/Screenshot-2018-07-23-21.51.55-1024x590.png)
Hjólreiðamenn léku listir sínar og leystu þrautir ( Eldurinn 2016, úr drónamyndskeiði )
Fjöldi tónleika, námskeið, sýningar o.fl. verður á hátíðinni, sjá má veglega dagskrá hér
Meðal viðburða eru tónleikar í hinu forna Borgarvirki í Vesturhópi.
![](https://trolli.is/wp-content/uploads/2018/07/Screenshot-2018-07-23-22.16.42-1024x661.png)
Frá Borgarvirki á hátíðinni Eldur í Húnaþingi
Að heimsækja Eld í Húnaþingi er löngu orðið fastur punktur hjá heimamönnum, mörgum burtfluttum Hvammstangabúum og öðrum úr Húnaþingi Vestra.
Listrænn stjórnandi Elds 2018 er Greta Clough, en hún segir meðal annars um hátíðina:
“Eldur er meira en bæjarhátíð. Eldur er stundin þar sem við segjum frá því hver við erum og það er síbreytilegt – á Eldi fögnum við fortíð okkar og fjárfestum í framtíð okkar í Húnaþingi vestra. Þetta er stund þar sem við komum saman og einfaldlega fögnum því að vera til á sama tíma. Stund þar sem við njótum samvista við fjölskylduna, hittum gamla og nýja vini, hlustum á góða tónlist, fáum innblástur og njótum sumarsólarinnar. Eldur hefur verið haldin árlega frá því 2003 og er tilhlökkunarefni meðal bæði íbúa og gesta.”
Frétt: Gunnar Smári Helgason
Myndir: af vef og úr drónamyndskeiði sem finna má hér.