Hátt í 90% verðandi foreldra sækja nú um fæðingarorlof með stafrænum hætti, en stafræn umsókn um fæðingarorlof hefur undanfarin ár verið í stöðugri þróun hjá Stafrænu Íslandi og Vinnumálastofnun.
Síðan opnað var fyrir stafrænar umsóknir í byrjun árs 2022, hefur áhersla verið lögð á að auka og bæta virkni umsóknarferlisins sem auðveldar verðandi foreldrum enn frekar að sækja um fæðingarorlof á einfaldan og notendavænan hátt. Í fyrstu stafrænu útgáfu umsóknarinnar gátu um 70% verðandi foreldra sótt um fæðingarorlof stafrænt, þ.e. fólk á almennum vinnumarkaði og sjálfstætt starfandi.
Eins og notkunin sýnir hafa foreldrar tekið stafrænni umsókn um fæðingarorlof gríðarlega vel enda er nú með einföldum hætti hægt að ganga frá umsókn í símanum, sem áður krafðist talsvert meiri vinnu og fyrirhafnar. Einnig hefur yfirsýn yfir umsóknir batnað en hægt er að fylgjast með stöðu þeirra á Mínum síðum Ísland.is og í Ísland.is appinu.
Markvisst hefur verið unnið að því síðastliðið ár að gera stafrænu umsóknina aðgengilega fyrir alla. Nú geta námsmenn, foreldrar utan vinnumarkaðar og atvinnuleitendur sótt um fæðingarorlof á vefnum. Þá er einnig hægt að sækja um ný tímabil og breyta tímabilum á fæðingarorlofi. Nýjasti hópurinn sem mun á næstu misserum geta sótt um stafrænt eru þau sem taka barn í varanlegt fóstur eða ættleiða barn. Að auki mun barnshafandi foreldri, sem vegna sérstakra aðstæðna þarf að dvelja fjarri heimili sínu fyrir fæðingu barns, geta sótt um dvalarstyrk. Þar með er hringnum lokað og stafrænt fæðingarorlof aðgengilegt öllum sem vilja.
Hið nýja sjálfvirka ferli sækir öll þau gögn sem þurfa að fylgja umsókninni og sendir sjálfkrafa áfram til maka og atvinnurekanda til samþykktar, en ef kalla þarf eftir frekari gögnum, eins og læknisvottorði eða staðfestingu á skólavist námsmanna er nú hægt að bæta þeim gögnum við á síðari stigum í ferlinu.
Andri Heiðar Kristinsson framkvæmdastjóri Stafræns Íslands:
Stafræn umsókn um fæðingarorlof hefur rutt leiðina fyrir flókna ferla sem kalla eftir gagnaöflun frá mörgum stofnum. Það er virkilega ánægjulegt og hvetjandi að sjá að verðandi foreldrar eru að taka stafræna ferlinu vel.
Stafræn umsókn um fæðingarorlof er gríðarstórt samstarfsverkefni Fæðingarorlofssjóðs, sem heyrir undir Vinnumálastofnun, og Stafræns Ísland. Það var upphaflega unnið í samstarfi við þróunarteymið Aranja, en frá mars 2022 tók ráðgjafafyrirtækið Deloitte við verkefninu.
Mynd/pixabay
