Norðurland hefur verið í vetrarbúningi að undanförnu og andrúmsloftið minnir á að fátt jafnast á við hvítar brekkur og vel lagðar brautir.
Sú varð einnig raunin hjá Menntaskólanum á Tröllaskaga þar sem nemendur nutu þess að bregða sér úr skólastofunni og út í vetrarblíðuna.
Það var nemendaráð skólans sem átti frumkvæðið að því að efnt yrði til skíðadags. Hugmyndin fékk góðar undirtektir hjá skólastjórnendum sem brugðust skjótt við og tryggðu nemendum aðgang að skíðasvæðinu í Tindaöxl á Ólafsfirði ásamt nauðsynlegum búnaði.
Eftir hádegi í gær fjölmenntu nemendur í Tindaöxl þar sem líf og fjör tók við. Sumir stigu á skíði í fyrsta sinn og nutu leiðsagnar íþróttakennara um undirstöðuatriðin. Aðrir voru þaulreyndir og renndu sér af öryggi niður brekkurnar.
Snjóbretti sáust á lofti, gönguskíði voru reynd og svigskíðin voru hvað algengust. Hvort sem um var að ræða byrjendur eða vana iðkendur ríkti sama gleðin.
Veðrið var nemendum hliðhollt og myndir dagsins endurspegla bæði gleði og fjör í brekkunum. Skíðadagurinn reyndist því bæði kærkomin tilbreyting frá hefðbundnu skólastarfi og áminning um þá möguleika sem vetraríþróttirnar bjóða upp á í Fjallabyggð þegar snjórinn lætur sjá sig.
Myndir: mtr.is / ÞH
