Aðfaranótt mánudagsins 21. janúar 2019 verður almyrkvi á tungli, sá fyrsti sem sést hefur frá Íslandi síðan 28. september 2015. Næst sést almyrkvi á tungli frá Íslandi 16. maí 2022.
Tunglmyrkvinn hefst klukkan 02:37 en milli klukkan 04:41 og 05:43 er tunglið almyrkvað og þá rauðleitt á himninum. Myrkvinn á sér stað á næst nálægasta fulla tungli ársins.
Tunglið fær á sig rauðleitan blæ sem rekja má til ljóss sem berst frá öllum sólsetrum og sólarupprásum á jörðinni á þeim tíma. Almyrkvann nú ber upp á næsta nálægasta fulla tungl ársins.
Tunglmyrkvar verða þegar sólin, Jörðin og tunglið liggja hér um bil í beinni línu. Tunglmyrkvar verða því aðeins þegar tungl er fullt og gengur inn í skugga Jarðar.
Heimild: Stjörnufræðivefurinn
Mynd: Kristín Sigurjónsdóttir
