Fjárlagafrumvarpið: Helstu áherslur í heilbrigðismálum
Stóraukin framlög til þjónustu við aldraða, styrking heilsugæslunnar, auknir fjármunir til að lækka greiðsluþátttöku sjúklinga, efling geðheilbrigðisþjónustu og aukið fé til að innleiða ný lyf. Þessi verkefni og fleiri endurspegla megináherslur fjárlagafrumvarpsins á sviði heilbrigðismála. Síðast en ekki síst verður uppbygging Landspítala við Hringbraut áfram í forgangi.
Samkvæmt frumvarpinu verða framlög til málefnasviða sem heyra undir heilbrigðisráðherra tæpir 260 milljarðar króna árið 2020. Þar af nema verðlags- og launabætur rúmum átta milljörðum króna. Aukningin nemur um 8% frá fjárlögum þessa árs, eða sem svarar um 20 milljörðum króna.
Heilsugæslan í öndvegi
Áfram verður haldið að efla heilsugæsluna sem fyrsta viðkomustað fólks í heilbrigðiskerfinu og eru 200 milljónir króna merktar því verkefni. Áhersla verður lögð á áframhaldandi uppbyggingu geðheilsuteyma um allt land. Í ár runnu 650 milljónir króna til reksturs þeirra og nú verður bætt um betur með 100 milljóna króna framlagi til viðbótar. Þjónusta heilsugæslunnar við aldraða verður styrkt með 200 milljónum króna til að innleiða heilsueflandi heimsóknir. Framlög til að bæta heilbrigðisþjónustu við fanga, þar með talda geðheilbrigðisþjónustu, hækka um 90 milljónir króna á næsta ári sem að hluta renna til samninga við heilsugæsluna um veitingu þjónustunnar. Reglubundin bólusetning barna við hlaupabólu hefst á næsta ári og renna til þess um 40 milljónir króna.
Dregið úr greiðsluþátttöku sjúklinga
Unnið verður að því markmiði að draga úr greiðsluþátttöku sjúklinga og nema aukin framlög til þess 300 milljónum króna á næsta ári. Lækkun greiðsluþátttöku er afgerandi þáttur í því að tryggja jafnt aðgengi fólks að heilbrigðisþjónustu segir heilbrigðisráðherra: „Hún þarf að verða áþekk því sem lægst gerist hjá hinum Norðurlandaþjóðunum, eða á bilinu 15 – 16%. Við stígum skref í þessa átt með auknu framlagi næsta árs og höldum svo áfram af krafti með 800 milljóna króna viðbótarframlagi ár hvert næstu fjögur ár, samkvæmt fjármálaáætlun ríkisstjórnarinnar“ segir Svandís Svavarsdóttir.
Um 3,7 milljarðar króna í uppbyggingu og rekstur hjúkrunarrýma
Áhersla verður lögð á að fjölga sérhæfðum dagdvalarrýmum fyrir fólk með heilabilun og áformað er að koma á fót sveigjanlegri dagdvöl fyrir aldraða sambærilegri dagdvöl af því tagi sem opnuð var á Akureyri á þessu ári. Í samræmi við áætlun um uppbyggingu hjúkrunarrýma er í fjárlagafrumvarpinu gert ráð fyrir að auka framlög til uppbyggingar hjúkrunarrýma um 1,8 milljarð króna á næsta ári. Aukin framlög til reksturs hjúkrunarrýma sem leiðir af fjölgun þeirra nemur tæpum 1,9 milljörðum króna. Munar þar mestu um 99 hjúkrunarrými á nýju heimili við Sléttuveg í Reykjavík sem tekið verður í notkun á árinu. Hjá Heilbrigðisstofnun Vesturlands í Stykkishólmi verður ráðist í úrbætur á sjúkradeildinni og gerðar mikilvægar endurbætur til að bæta aðstæður aldraðra á hjúkrunarheimilinu.
Um 8,5 milljarðar króna til uppbygging Landspítala
Uppbygging Landspítala verður áfram í forgangi. Samkvæmt fjárlagafrumvarpinu 2019 renna samtals um 8,5 milljarðar króna til verkefnisins. Þá hefst uppsteypa meðferðarkjarnans og einnig verður unnið að fullnaðarhönnun rannsóknahússins. Í undirbúningi er að flýta uppbyggingu dag-og göngudeildarhúss við Hringbraut og verður ráðist í þarfagreiningu vegna þess á árinu með þátttöku starfsfólks Landspítala: „Byggingarframkvæmdir af þessari stærðargráðu taka til sín gríðarmikla fjármuni en við skulum hafa hugfast að þegar öllu er á botninn hvolft snúast þessar framkvæmdir um fólk, um betri aðbúnað sjúklinga, bættar aðstæður starfsfólksins, aukin gæði og árangursríkari heilbrigðisþjónustu“ segir Svandís Svavarsdóttir heilbrigðisráðherra.
Mynd: pixabay
