Katrín Jakobsdóttir, forsætisráðherra, lagði fram minnisblað á ríkisstjórnarfundi í morgun þar sem áréttað var mikilvægi þess að skoðað verði gaumgæfilega hvort að þær stofnanir sem ráðuneyti áformi að setja á laggirnar geti verið staðsettar utan höfuðborgarsvæðisins.
Í stjórnarsáttmála ríkisstjórnarinnar er lögð áhersla á að móta og byggja upp öflugt og sterkt samfélag. Ríkisstjórnin telur að mikil verðmæti felist í því að landið allt sé í blómlegri byggð og að landsmenn eigi að hafa jafnan aðgang að þjónustu, atvinnutækifærum og lífskjörum um land allt.
Byggðaáætlun 2018 til 2024 telur 54 aðgerðir sem skiptast niður á þrjú svið; a) jafna aðgengi að þjónustu, b) jafna tækifæri til atvinnu og c) stuðla að sjálfbærri þróun byggða. Ábyrgð á framkvæmd þessara 54 aðgerða dreifist á flest ráðuneyti.
