Íbúum Fjallabyggðar hefur fjölgað um 9 manns frá 2019

Þann fyrsta mars 2026 voru samkvæmt Þjóðskrá 2.016 íbúar með lögheimili í Fjallabyggð. Þann 1. des. 2025 voru íbúar Fjallabyggðar 2.017 og hefur því fækkað um einn íbúa.

Í desember 2019 voru íbúar Fjallabyggðar 2.007, þannig að Íbúatala sveitarfélagsins hefur aukist um 9 manns á síðastliðnum 6 árum.

Íbúum Reykjavíkurborgar fjölgaði um 498 íbúa á tímabilinu frá 1. desember 2025 til 1. mars 2026 og íbúum Hafnarfjarðar fjölgaði á sama tímabili um 206 íbúa. Íbúum Akureyrarbæjar fjölgaði á tímabilinu um 70 íbúa, í Reykjanesbæ hefur fækkað um 23 íbúa og í Sveitarfélaginu Árborg fjölgaði um 58 íbúa.

Fjölgar hlutfallslega mest í Fljótsdalshreppi

Þegar horft er til hlutfallslegrar breytingar á íbúafjölda þá hefur íbúum í Fljótsdalshreppi fjölgað hlutfallslega mest frá 1. desember 2025 um 5,9% en íbúum þar fjölgaði um 7 íbúa. Hlutfallslega fjölgaði íbúum næst mest í Súðavíkurhreppi eða um 3,5%. Af 62 núverandi sveitarfélögum þá fækkaði íbúum í 26 sveitarfélögum en fjölgaði eða stóð í stað í 36 sveitarfélögum.