Boðið verður upp á fjölbreytta og hátíðlega dagskrá í kirkjum Fjallabyggðar um jólin, þar sem messur og jólastund marka helstu stundir hátíðarinnar. Að venju er lögð rík áhersla á fallega kirkjutónlist og notalega samveru.
Á aðfangadag, 24. desember, verður hátíðarmessa í Ólafsfjarðarkirkju klukkan 17.00. Sr. Stefanía Steinsdóttir prédikar og þjónar fyrir altari. Kór Ólafsfjarðarkirkju og Kór Siglufjarðarkirkju syngja saman og Ave Kara Sillaots verður organisti og stjórnandi.
Sama dag, aðfangadag, verður jólastund í Siglufjarðarkirkju klukkan 17.00. Hörður Ingi Kristjánsson leikur undir á píanó og Tinna Hjaltadóttir flytur einsöng. Þá verður jólasaga lesin og skapaður hlýlegur og hugljúfur andi í kirkjunni.
Á jóladag, 25. desember, verður hátíðarmessa í Siglufjarðarkirkju klukkan 14.00. Sr. Sigurður Ægisson prédikar og þjónar fyrir altari. Kór Ólafsfjarðarkirkju og Kór Siglufjarðarkirkju syngja og Ave Kara Sillaots annast organleik og stjórn.
Íbúar Fjallabyggðar eru hvattir til að sækja þessar hátíðlegu samkomur og eiga saman kyrrláta og innihaldsríka stund í tilefni jólanna. Allir eru hjartanlega velkomnir.
