Í gær var Eyjólfur Eyjólfsson, umsjónarmaður Þjóðlagasetursins, við upptökur í tanki þeim sem stendur milli húsa Síldarminjasafns Íslands á Siglufirði.
![](https://trolli.is/wp-content/uploads/2018/08/DSC05824.jpg)
Eyjólfur Eyjólfsson við upptökur
Eyjólfur hljóðritaði þar eigin verk sem hann hefur samið fyrir gjörningaverk, með samfélagslegri skírskotun, fyrir hollenska listakonu sem ber nafnið Wilma Marijnissen.
![](https://trolli.is/wp-content/uploads/2018/08/DSC05831.jpg)
Í sumum verkunum er einnig sungið með langspilinu.
Sýningar á verkinu verða erlendis í september. Þar mun hópur fólks hreyfa sig innan um stóra steypu-skúlptúra á meðan tónlistin er leikin.
Verkið heitir TERRA MATER, sem er latína og þýðir Móðir Jörð. Gjörningurinn er með tilvísun í forneskju og goðafræði. Wilma fékk Eyjólf til að semja og leika tónlist á langspil, sem tengist miðalda tónheimi.
![](https://trolli.is/wp-content/uploads/2018/08/DSC05856.jpg)
Hér sést einnig í raftónlistar-búnaðinn.
Eyjólfur notar einnig “lúppu” sem er raftónlistarleg nálgun við verkefnið. Með því má láta eitt langspil hljóma margfalt og mynda þannig fjölbreytilegan og tilkomumikinn hljóm. Hann syngur einnig með í sumum verkanna.
![](https://trolli.is/wp-content/uploads/2018/08/DSC05820.jpg)
.
Eyjólfur leggur einnig stund á mastersnám í þjóðfræði við Háskóla Íslands, svo langspilið er honum kært á ýmsa vegu.
Frétt og myndir: Gunnar Smári Helgason