Menntaskólanum á Akureyri verður slitið í 138. sinn í Íþróttahöllinni 17. júní klukkan 10.00. Húsið er opið
gestum frá klukkan 9.00.

Skólameistari, Jón Már Héðinsson mun brautskrá 164 stúdenta. Við upphaf athafnarinnar leika Una
Haraldsdóttir fráfarandi konsertmeistari á píanó, Sólrún Svava Kjartansdóttir á fiðlu og Rún Árnadóttir á
selló, en á meðan gengið er í salinn leikur Birna Eyfjörð Þorsteinsdóttir nýr konsertmeistari skólans á
píanó.

Fulltrúar afmælisárganga munu flytja ávörp auk fulltrúa nýstúdenta. Þar er um að ræða fulltrúa 10
ára stúdenta, 25 ára, 40, 50, 60 og 70 ára stúdenta. Þá verða kvaddir þrír kennarar, sem lengi hafa
starfað við skólann, Sigurður Ólafsson sem kennt hefur hér í 24 ár, Sigurður J. Bjarklind sem lét af
störfum um síðustu áramót eftir 40 ára starf og Sverrir Páll Erlendsson, sem starfað hefur hér í 44 ár.

Að brautskráningu lokinni, um hádegisbil, verður haldið rakleitt í myndatöku í útiþrepunum við
Möðruvelli. Á sama tíma og allt fram til klukkan 15.00 verður opið hús í skólanum og gestum boðið að
þiggja léttar veitingar, skoða skólahúsin og sýningu á verkefnum nemenda, sem verður í kennslustofum á
Hólum, og listaverk skólans, sem eru í öllum skólahúsunum.

Nú hafa verið settar merkingar við nánast öll myndlistarverk í eigu skólans og þau eru um öll skólahúsin. Þá verður og opið upp á Suðurvistir í Gamla
skóla, en þar er meðal annars svolítil sýning á gömlum kennslutækjum. Einnig verður Bókasafn skólans
opið og þar verður eitt og annað að sjá, meðal annars gamlar Carminur.

Um kvöldið er Hátíðarveisla nýstúdenta og fjölskyldna þeirra í Íþróttahöllinni og þar verða skemmtiatriði
úr röðum stúdentanna. Þar munu um 1100 manns sitja til borðs. Undir miðnætti hópast nýstúdentar í
bæinn og dansa og syngja á Torginu en síðan verður dansað fram á nótt í höllinni við leik
hljómsveitarinnar Í svörtum fötum.

Undirbúningur stúdentahátíðarinnar hefur staðið yfir undanfarið, en siðameistari er Anna Sigríður
Davíðsdóttir. Umsjá hátíðarveislunnar um kvöldið er í höndum Eyrúnar Huldar Haraldsdóttur en Hafdís
Inga Haraldsdóttir heldur utan um sýningu á verkefnum nemenda.

Frétt: aðsend

Umsagnir eru á ábyrgð þess sem ritar - Trölli áskilur sér rétt til að eyða óviðeigandi ummælum.