Fréttir berast af allmiklum svartfugladauða fyrir austan land.
Það mun einnig eiga við um Norðurland, til dæmis finnast dauðir svartfuglar á fjörum inn um Eyjafjörð.
Líklegast þykir að ætisskortur sé ástæða þessa fugladauða.
![](https://trolli.is/wp-content/uploads/2022/01/IMG_20211226_135938_edit_32122930825826-1024x768.jpeg)
Raggi Ragg og Lisa Dombrowe sem tíðum fara um Héðinsfjörð hafa sagt þau tíðindi þaðan að mikið af svartfuglahræjum liggi í fjörum – og greinilegt að refum og hröfnum sé boðið til veislu. Taldi Raggi að 50-70 hræ hefðu verið þar sýnileg, aðallega langvía og álka.
Einnig fundu þau fimm haftyrðla frosna ofan í klakanum fram við Héðinsfjarðarvatn. Einum náði Lísa lifandi, bar með sér út í fjöru og sleppti á sjóinn.
![](https://trolli.is/wp-content/uploads/2022/01/IMG_20211226_142422_edit_32257895246118-1-1024x768.jpeg)
Meðfylgjandi myndir af haftyrðlinum og úr drungalegri Héðinsfjarðarfjöru tók Lisa Dombrowe.