Veðurstofa Íslands hefur gefið út stutt yfirlit um tíðarfar á Íslandi í október 2023.
Tíðarfar var nokkuð hagstætt í október. Hiti á landsvísu var nærri meðallagi áranna 1991 til 2020. Það var að tiltölu kaldast á Norðausturlandi en hlýrra suðvestanlands. Það var sérlega hægviðrasamt í lok mánaðar.
Hiti
Meðalhiti í Reykjavík í október var 5,4 stig. Það er 0,5 stigum yfir meðallagi áranna 1991 til 2020 en jafnt meðallagi síðustu tíu ára. Á Akureyri var meðalhitinn 2,7 stig, 0,8 stigum undir meðallagi áranna 1991 til 2020 en 1,3 stigum undir meðallagi síðustu ára. Í Stykkishólmi var meðalhiti mánaðarins 4,8 stig og 5,2 stig á Höfn í Hornafirði.
Meðalhita og vik frá fleiri stöðum má sjá í eftirfarandi töflu.
| stöð | meðalhiti °C | vik 1991-2020 °C | röð | af | vik 2013-2022 °C |
| Reykjavík | 5,4 | 0,5 | 40 | 153 | 0,0 |
| Stykkishólmur | 4,8 | 0,4 | 45 | 178 | -0,2 |
| Bolungarvík | 3,9 | 0,2 | 49 til 50 | 126 | -0,6 |
| Grímsey | 3,9 | 0,1 | 49 | 150 | -0,8 |
| Akureyri | 2,7 | -0,8 | 86 | 143 | -1,3 |
| Egilsstaðir | 2,9 | -0,8 | 48 | 67 | -1,4 |
| Dalatangi | 4,9 | -0,2 | 46 til 47 | 86 | -1,0 |
| Teigarhorn | 4,7 | -0,4 | 68 | 151 | -0,8 |
| Höfn í Hornaf. | 5,2 | -0,5 | |||
| Stórhöfði | 6,2 | 0,8 | 22 | 146 | 0,4 |
| Hveravellir | -0,5 | 0,1 | 24 | 59 | -0,4 |
| Árnes | 4,2 | 0,4 | 49 | 144 | -0,1 |
Meðalhiti og vik (°C) í október 2023
Hiti var undir meðallagi síðustu tíu ára á nær öllu landinu nema á suðvesturhorninu. Að tiltölu var kaldast á Norðausturlandi en hlýjast við suðurströndina. Neikvætt hitavik miðað við síðustu tíu ár var mest -1,8 stig á Torfum í Eyjafirði. Jákvætt hitavik miðað við síðustu tíu ár var mest 0,5 stig á Skarðsheiði.
Hitavik (°C) sjálfvirkra stöðva í október miðað við síðustu tíu ár (2013 til 2022).
Meðalhiti mánaðarins var hæstur í Surtsey, 7,3 stig. Lægstur var hann á Gagnheiði -2,3 stig. Í byggð var meðalhitinn lægstur í Möðrudal -0,3 stig.
Hæsti hiti mánaðarins mældist 14,7 stig við Mörk á Landi og í Skaftafelli þ. 19. Mest frost í mánuðinum mældist -14,6 stig í Möðrudal þ. 31.
Úrkoma
Úrkoma í Reykjavík mældist 125,3 mm sem er um 60% umfram meðallag áranna 1991 til 2020. Á Akureyri mældist úrkoman 64,4 mm sem er um 90% af meðalúrkomu áranna 1991 til 2020. Í Stykkishólmi mældist úrkoman í október 39,0 mm og 87,2 mm á Höfn í Hornafirði.
Dagar þegar úrkoma mældist 1,0 mm eða meiri í Reykjavík voru 15, tveimur fleiri en í meðalári. Á Akureyri mældist úrkoma 1,0 mm eða meiri 7 daga sem er fjórum færri en í meðalári.
Snjór
Jörð var alauð alla morgna í Reykjavík nema einn dag þegar það var flekkótt. Á Akureyri voru fjórir flekkóttir morgnar en annars alautt. Fyrsti snjór mánaðarins féll víða þ. 12. Þá var einnig töluvert hvassviðri og þónokkrar samgöngutruflanir urðu á fjallvegum.
Sólskinsstundafjöldi
Sólskinsstundir í Reykjavík mældust 88,9, sem er 2,7 stundum færri en að meðallagi áranna 1991 til 2020. Á Akureyri mældust sólskinsstundirnar 71,7, sem er 23,8 stundum fleiri að að meðallagi áranna 1991 til 2020.
Vindur
Vindur á landsvísu var 0,2 m/s undir meðallagi. Hvasst var þ. 10. (norðvestanátt), þ. 12.(norðaustanátt) og dagana 18. til 20. (suðaustanátt). Hægviðrasamt var í lok mánaðar.
Loftþrýstingur
Meðalloftþrýstingur í Reykjavík var 1005,4 hPa sem er 1,2 hPa yfir meðallagi áranna 1991 til 2020.
Hæsti loftþrýstingur mánaðarins mældist á 1028,7 hPa á Önundarhorni undir Eyjafjöllum þ. 7. Lægstur mældist loftþrýstingur 967,9 hPa á Fonti á Langanesi þ. 10.
Fyrstu tíu mánuðir ársins
Meðalhiti í Reykjavík fyrstu tíu mánuði ársins mældist 5,8 stig sem er 0,1 stigi undir meðallagi áranna 1991 til 2020, en 0,3 stigum undir meðallagi síðustu tíu ára. Meðalhiti mánaðanna tíu raðast í 35. hlýjasta sæti á lista 153 ára. Á Akureyri var meðalhiti mánaðanna tíu 5,3 stig, sem er 0,2 stigum yfir meðallagi áranna 1991 til 2020 en 0,1 stigi undir meðallagi síðustu tíu ára. Meðalhitinn á Akureyri raðast í 23. hlýjasta sæti á lista 143 ára.
Úrkoma í Reykjavík það sem af er ári hefur mælst 788,7 mm sem er um 15% umfram meðallag áranna 1991 til 2020. Á Akureyri hefur úrkoman mælst 401,7 mm sem er um 90% af meðalúrkomu áranna 1991 til 2020.
Skjöl fyrir október
Meðalhiti á sjálfvirkum veðurstöðvum í október 2023 (textaskjal).
Daglegt yfirlit mánaðarins á þremur veðurstöðvum er hægt að sækja í sérstaka töflu.
