Kaupsamningum fækkar um 34,7% á milli mánaða

Þjóðskrá hefur tekið saman upplýsingar um veltu á fasteignamarkaði eftir landshlutum í síðasta mánuði samkvæmt þinglýstum gögnum.

Fjöldi fasteigna sem gekk kaupum og sölum á landinu öllu var 846 og var upphæð viðskiptanna um 52,0 milljarðar króna þegar miðað er við útgáfudagsetningu.

Þegar janúar 2022 er borinn saman við desember 2021 fækkaði kaupsamningum um 34,7% en velta lækkaði um 38,4%. Á höfuðborgarsvæðinu fækkaði samningum um 36,3% á milli mánaða og velta lækkaði um 37,6%.

	Alls	Sérbýli	Fjölbýli	Atvinnueignir	Sumarhús	Annað
Heildarvelta í síðasta mánuði	52.030	15.112	30.182	5.073	988	675
Þar af höfuðborgarsvæðið	38.108	9.064	24.106	4.355	535	47

	Alls	Sérbýli	Fjölbýli	Atvinnueignir	Sumarhús	Annað
Kaupsamningar í síðasta mánuði	864	196	547	84	18	19
Þar af höfuðborgarsvæðið	531	78	400	50	1	2

Hægt er að sjá veltu á fasteignamarkaði frá júní 2006 til 22. febrúar 2022 í skjali sem Þjóðskrá gefur út þar sem gögnunum er skipt í flokka eftir landshlutum og tegund húsnæðis.

Hagstofan birtir upplýsingarnar með þeim fyrirvara að ekki er búið að skanna og skrá alla samninga sem heyra til síðasta mánaðar, tölurnar verða því uppfærðar. Einnig er hægt að nálgast upplýsingar í fasteignagátt Þjóðskrár.