Það var síðla dags miðvikudaginn 24. september þegar Þorsteini Þorvaldssyni barst tölvupóstur frá höfuðstöðvum VÍS í Reykjavík. Þar var honum tjáð að það ætti að loka umboðsskrifstofunni eigi síðar en 1. október eða 6 dögum síðar, Þorsteinn skellti strax í lás.
Þar með lauk 40 ára sögu VÍS í Ólafsfirði og síðar Fjallabyggð og yfir 100 ára sögu fjölskyldu Þorsteins í þjónustu tryggingafyrirtækja. Afi Þorsteins, Þorsteinn Þorsteinsson og faðir hans Þorvaldur Þorsteinsson störfuðu áður hjá Brunabótafélaginu, forvera VÍS.
Ásamt því að starfa hjá VÍS hefur Þorsteinn starfað í Kjörbúðinni í Ólafsfirði. Fyrir 1 1/2 mánuði síðan sagði hann starfi sínu lausu hjá Kjörbúðinni til að snúa sér alfarið að VÍS og er því án atvinnu í dag, því er þessi uppsögn mikið áfall.
VÍS lokaði um 13 skrifstofum á landsbyggðinni og sameinaði nokkrar. Í dag eru skrifstofur á Ísafirði, Sauðárkróki, Akureyri, Egilstöðum, Selfoss og Reykjavík. Það var eins og einn íbúi Fjallabyggðar orðaði það ” Þeir slátruðu landsbyggðinni eins og hún lagði sig í þjónustustigi og persónulegum samskiptum”.
VÍS bendir íbúum Fjallabyggðar á að hafa samskipti við höfuðstöðvarnar í Reykjavík í framtíðinni.
Hávær mótmæli hafa borist víða að vegna lokana hjá VÍS á landsbyggðinni en lokun skrifstofunnar í Fjallabyggð hefur farið hljótt.
Sjá frétt: Mótmæla lokun VÍS á Hvammstanga
Hjónin Gunnlaug Kristjánsdóttir og Þorsteinn Þorvaldsson Þakka viðskiptavinum sínum fyrir ánægjulegt og gott samstarf í rúm 40 ár sem þau hafa verið með VÍS umboðið.
Hjónin Gunnlaug Kristjánsdóttir og Þorsteinn Þorvaldsson hafa starfað í rúmlega 40 ár hjá VÍS
Viðskiptavinum er bent á að fara til Reykjavíkur
Frétt: Kristín Sigurjónsdóttir
Myndir: Kristín Sigurjónsdóttir og í einkaeign
