Starfsfólk Samtaka sveitarfélaga á Norðurlandi vestra heimsótti í vikunni Foodsmart Nordic sem er nýtt hátækni- og nýsköpunarfyrirtæki á Blönduósi.
Foodsmart Nordic fékk styrk úthlutun Sóknaráætlunar Norðurlands vestra, Uppbyggingarsjóðs 2023 að upphæð 3 milljónir og 120 þúsund í vöruþróun og markaðssetningu á Sæbjúgum sem fæðubótar- og bragðefni.
Það var Viðar Þorkelsson framkvæmdastjóri sem tók vel á móti hópnum og kynnti starfsemina.
Foodsmart Nordic framleiðir hágæða fæðubótaefni úr íslensku sjávarfangi sem áður fyrr fór forgörðum. Félagið sér mikil tækifæri í framleiðslu á hágæða fæðubótarefnum úr íslenskum hráefnum í samstarfi við önnur fyrirtæki í matvælaiðnaðinum. Stefnt er að því að framleiða 150 tonn af endanlegum afurðum í þessum fyrsta áfanga fyrirtækisins á Blönduósi og verður framleiðslan gæðavottuð til útflutnings.
Sérhannað húsnæði Foodsmart Nordic að Ægisbraut 2 á Blönduósi er tilbúið og nemur fjárfestingin 500-600 m.kr. samtals í fasteign og tækjabúnaði. Um er að ræða fyrsta áfanga aðstöðunnar en stefnt er að frekari stækkun þegar fram í sækir og umsvif aukast í kjölfar fyrirhugaðrar markaðssóknar ytra. Nýju framleiðslutækin skila úrvals hráefni í duftformi og nýtast við þurrkun á breiðu sviði af hráefnum.
Rannsóknarsetur félagsins hefur undanfarin ár verið staðsett á Skagaströnd og þar hefur staðið yfir tilrauna framleiðsla á kollageni, sem er eitt helsta uppbyggingarefni líkamans, ásamt sæbjúgnadufti og fiskpróteinum úr íslenskum þorski.
Mynd/SSNV
