Vetrarsólstöður verða klukkan 22:23 í kvöld, föstudagskvöldið 21. desember 2018. Halli norðurhvels Jarðar frá sólu er þá mestur svo sól er lægst á lofti frá okkur séð og birtustundir fæstar. Eftir föstudaginn tekur sól að rísa á ný.
Ingvar Erlingsson fangaði magnaða birtuna sem var á Siglufirði í dag, 21. desember og leyfum við lesendum að njóta þess.
![](https://trolli.is/wp-content/uploads/2018/12/35462b15be795e2c37be805161da6a929256fcc6b9097b04e33b13a18305bbfe-e1545409081242.jpeg)
Við smábátahöfnina
Á morgun, 22. desember, kemur sólin upp kl. 11:22 og verður svo næstu sjö daga, en fer að koma fyrr upp þaðan í frá.
Síðdegis fer daginn að lengja strax á morgun, þá um örfáar sekúndur og svo hraðar eftir það. Norðanlands er birtutími um klukkustund skemmri en syðra og í Grímsey, á heimskautsbaug, er sólarupprás í dag kl. 12:03.
![](https://trolli.is/wp-content/uploads/2018/12/8b5457a167d5a438877479bca1b3ca4b0252c9c3de56bdbd5af773ee4ea05e38-e1545409111800.jpeg)
Nýi kirkjugarðurinn á Siglufirði
Möndulhalli Jarðar er ástæða þess að þetta gerist. Jörðin er ekki upprétt í geimnum, heldur hallar snúningsás hennar miðað við sólbauginn, flötinn sem hún ferðast eftir í kringum sólina. Hallinn sjálfur breytist ekki og þess vegna halla norður- og suðurhvel að og frá sólu til skiptis.
Möndulhallinn veldur því að sólin er mishátt á lofti yfir árið. Þegar norðurhvel hallar að sólinni er sól hæst, í júní, en þegar norðurhvel hallar frá sólinni er sól lægst.
![](https://trolli.is/wp-content/uploads/2018/12/717affba76d6577691ed1ec3a45bace7e246c64e57b1f43c3ffd7319e9b2f376-e1545409098562.jpeg)
Siglufjörður 21. desember 2018
![](https://trolli.is/wp-content/uploads/2018/12/ffcd3e876a4f5e44f9c02f7fcf0211894f121ec5a0d92009334f8456f9a2f3ba-e1545409063721.jpeg)
Hólshyrnan
Myndir Ingvar Erlingsson
Heimild: Stjörnufræðivefurinn