Gestir Siglufjarðar hafa tíðum orð á því hve bærinn sé snyrtilegur og fallegur.
Og heimafólkið hefur ekki síður augun opin fyrir snyrtimennskunni og blómaskreytingum víða um bæ og margir hafa bókstaflega sagt: „aldrei fallegri!“
Til þess að svo megi vera þarf sannarlega að vinna fyrir því og þá mæðir mest á starfsmönnum bæjarins – samtímis því að eigendur húsa og garða sinna sínu.
En hvernig horfa þessi mál við starfsmönnum í Áhaldahúsi? Birgir Ingimarsson bæjarverkstjóri var tekinn tali.
Þessi umhverfismál okkar eru tvíþætt, segir Birgir. Fyrst samþykkir bæjarstjórn fjárframlög, sem hafa farið mjög hækkandi á seinustu tveimur árum, og markar þannig stefnuna. Þá tekur framkvæmdin við og þar hefur Elías Pétursson bæjarstjóri haft mikinn áhuga á að Fjallabyggðarbæirnir báðir verði snyrtir og fegraðir til muna – og sagt þetta verkefni vera eins og langhlaup, því verði sífellt að sinna, þar sem markmiðið er alltaf framundan. Síðan tökum við í Áhaldahúsinu við og þar hefur skipt afar miklu máli að Baldur Jörgen Daníelsson var ráðinn í fullt starf um síðustu áramót og hann hefur það hlutverk að sinna umhverfismálunum yfir sumartímann – og léttir þannig miklu álagi af mér. Yfir vetrartímann höfum við tækifæri til að velta vöngum og leggja á ráðin og svo kemur unga fólkið til starfa þegar sumrar og það eru nærri 60 krakkar að vinnuskólanum meðtöldum.
Myndirnar sem fylgja sýna hluta þeirra bæjarstarfsmanna sem fegra og snyrta.
Á forsíðumynd eru Telma Lind, Anna Día, Andri, Mateusz og Manúel.
Texti og myndir: ÖK
