Boeuf bourguignon – uppskrift fyrir 6

  • 1 kg nautahnakki
  • 200 g beikon
  • 1 laukur
  • 2 hvítlauksrif
  • 4 dl rauðvín
  • 2 msk tómatpúrra
  • 2 nautateningar
  • vatn (ca 6 dl, eða eins og þarf til að rétt fljóta yfir kjötið)
  • 10 sveppir
  • 5 perlulaukar
  • ólífuolía og smjör
  • salt og pipar
  • 2 lárviðarlauf
  • 1/2 tsk timjan
  • steinselja

Skerið kjötið í passlega stóra grýtubita og skerið beikonið í strimla. Hakkið laukinn. Bræðið smjör og olíu á pönnu við háan hita og steikið nautakjötið og laukinn, gjarnan í nokkrum skömmtum svo að kjötið brúnist vel. Saltið og piprið kjötið vel. Færið yfir í steypujárnspott og bætið vatni, rauðvíni, nautakraftsteningum, tómatpúrru og pressuðum hvítlauk í pottinn.

Látið pottinn yfir miðlungsháan hita (sirka stilling 3-4 af 9). Steikið núna beikonið á pönnunni sem kjötið var á og bætið því svo í pottinn, sem ætti núna að vera byrjaður að sjóða vægt. Bætið timjan og lárviðarlaufi í pottinn og leyfið nú að sjóða í amk 1-2 klst en því lengur því betra (gott að láta réttinn sjóða við mjög vægan hita allan daginn, örugglega hátt í 6 klst). Rétt áður en rétturinn er borinn fram eru sveppirnir skornir í fernt ásamt perlulauknum, steikt í vel af smjöri og síðan bætt í pottinn og látið liggja þar í smá stund.

Áður en rétturinn er borinn á borð er hakkaðri ferskri steinselju stráð yfir.

Uppskrift: Ljúfmeti og lekkerheit