FRÆG GÖNGUBRYGGJA Í UDDEVALLA. Myndasyrpusaga

Fyrir ekki svo löngu síðan birtist ykkur lesendum trölla.is, myndasyrpusaga um fallegar göngubryggjur í Lysekil og minntist pistlahöfundur þá á að fyrirmyndin væri eflaust sótt í fræga og dásamlega fallega göngubryggju sem hangir utan í klettum í Uddevalla.

SPÁSSERAÐ Á GÖNGU-BRYGGJUM. 30 MYNDIR

Þessi göngubryggja er stórt og mikið mannvirki og er hluti af um 9 km strandgönguleið gegnum Uddevalla bæjarfélagið og bindur miðbæinn við sögufræga náttúruperlu sem heitir Gustafsberg, sem er talin elsta heilsuhælismiðstöð Svíþjóðar.

Eins og sjá má á myndunum hér undir var það bæði erfitt og dýrt að byggja þessa gönguleið sem af mörgum er talin sú allrar fallegasta í Svíþjóð. Fyrir miðju er hengibrú yfir vík með grjótskriðum og þaðan er fallegt útsýni út Uddevallafjörðinn og í fjarlægð sér maður fallega risastóra hengibrú yfir sjálfan fjörðinn.

ATH. Hægt er að skoða myndirnar einar og sér og stækka með því að smella á hvaða mynd sem er og þá er hægt að fletta ljósmyndunum fram og til baka. En auðvitað er skemmtilegast að lesa myndaskýringartexta og aðrar sögur og útskýringar sem fylgja með.

*Panorama mynd sem sýnir Gustafsberg til vinstri, 149 metra háa “Uddevallabron” fyrir miðri mynd og til hægri sést í hafnarsvæðið og gamlar sögufrægar skipasmíðastöðvar.*

Göngubryggjan séð frá baðströndinni í Gustafsberg, hvíta húsið uppi á hæðinni er ráðstefnuhótelið Bohusgården og þar innan við liggur leiðin inní miðbæ Uddevalla.

Þrátt fyrir að það væri venjulegur mánudagur og skýjað og rigning í loftinu varð pistlahöfundur með myndavél á maganum að passa sig að verða ekki fyrir heilsugangandi- og skokkandi fólki sem notfærir sér bílalausa fallega gönguleið til afþreyingar.

Það er mikill sannleikur í orðunum á þessu skilti sem var skrúfað í klettinn við göngubryggjuna:
“**HANN LEIÐIR MIG AÐ VATNINU OG ÞAR FINN ÉG FRIÐ.**“

Að lokum koma hér undir tvær myndir af upplýsingaskiltum svo að þið getið áttað ykkur betur á staðsetningum og fl. áhugaverðu um Uddevalla og ekki síst um Gustafsberg, en ýtarlegir heimsókn þangað gæti orði næsti ferðasögu kafli.