Tilkynnt hefur verið um úthlutun úr Barnamenningarsjóði Íslands fyrir árið 2024. Sjóðurinn styrkir 41 metnaðarfullt verkefni og er heildarupphæð úthlutunarinnar 102,4 milljónir króna. Alls bárust 117 umsóknir og var sótt um 383 milljónir króna. Úthlutun var tilkynnt við athöfn í Safnahúsinu á degi barnsins, sunnudaginn 26. maí 2024.
Lilja Dögg Alfreðsdóttir menningarmálaráðherra og Guðný Hilmarsdóttir formaður stjórnar Barnamenningarsjóðs ávörpuðu gesti og greindu frá úthlutun. Kammersveit skipuð ungum listamönnum, þeim Sigrúnu Mörtu Arnaldsdóttur, Sólu Björnsdóttur og Sveindísi Eir Steinunnardóttur, lék tvö lög við góðar undirtektir.
„Það er blómlegt fram undan í barnamenningu og gleður mig ósegjanlega mikið að sjá hversu margar umsóknir bárust. Það segir okkur að efling ungra listhuga er eftirsóknarvert viðfangsefni hjá listafólkinu okkar sem lýsir metnaði fyrir skapandi framtíð landsins og það mun skila sér margfalt til baka til okkar allra. Því langar mig að þakka öllum þeim er sóttu um, fyrir hugmyndirnar og kraftinn því það er ekki alltaf auðsótt að koma hugmyndum í framkvæmd og það krefst eldmóðs sem er svo sannarlega til staðar hér,“ segir Lilja Dögg Alfreðsdóttir.
Hæsta styrkinn 11,5 milljónir, fær Reykjavíkurborg í samstarfi við Akureyrar- og Ísafjarðarbæ fyrir Leikskólaverkefnið sem byggir á samstarfi leik- og tónlistarskóla í öllum þremur sveitarfélögunum. Nemendur í tónlistarskóla vinna með elstu börnum leikskóla og lýkur verkefninu með sameiginlegum lokatónleikum. Næsthæsta styrkinn, 6 milljónir, fær Vestfjarðarstofa fyrir barnamenningahátíð Vestfjarða, Púkann 2025, en hátíðin fer fram vítt og breitt um Vestfjarðakjálkann. Þriggja manna fagráð fjallaði um umsóknirnar og menningarmálaráðherra samþykkti tillögu stjórnar sjóðsins um úthlutun.
Barnamenningarsjóður Íslands var stofnaður í tilefni aldarafmælis fullveldisins með ályktun Alþingis á hátíðarfundi 18. júlí 2018. Hlutverk sjóðsins er að fjármagna og styðja við fjölbreytta starfsemi á sviði barnamenningar með áherslu á sköpun, listir og virka þátttöku barna í menningarlífi. Í starfi sjóðsins er m.a. horft til áherslu menningarstefnu um samstarf stofnana, skóla, félagasamtaka og einstaklinga, ásamt því markmiði að jafna aðgengi barna og ungmenna að fjölbreyttum og vönduðum listviðburðum óháð búsetu og efnahag. Sjóðurinn var festur í sessi 23. maí 2023 með Þingsályktun um aðgerðaáætlun um eflingu barnamenningar fyrir árin 2024–2028.
| Styrkþegi | Heiti verkefnis | Úthlutun í kr |
| Reykjavíkurborg | Leikskólaverkefnið | 11.500.000 kr |
| Vestfjarðastofa ses. | Púkinn 2025 | 6.000.000 kr |
| Listasafn Íslands | Stattu og vertu að steini! | 5.800.000 kr |
| Austurbrú ses. | Uppspretta | 5.000.000 kr |
| Reykjanesbær | Virkjun skapandi lista meðal barna í Reykjanesbæ | 5.000.000 kr |
| Handbendi Brúðuleikhús ehf. | Studio Handbendi | 4.860.000 kr |
| Hringleikur – sirkuslistafélag | Sirkusinn og ég – Flipp Festival | 4.498.000 kr |
| Listasafn Árnesinga | Hringrásir – list og vísindi | 4.000.000 kr |
| Reykjavíkurborg | BIG BANG tónlistarhátíð | 4.000.000 kr |
| Afrika-Lole,áhugamannafélag | FAR Fest Afríka Barnamenning 24 – 25 | 3.700.000 kr |
| Trúðavaktin, félagasamtök | Trúðavaktin, íslensku sjúkrahústrúðarnir | 3.665.000 kr |
| Dansgarðurinn, félag | Dansfræðsludagar – Dans fyrir alla | 3.000.000 kr |
| Reykjavík Dance Festival. | Tilfinningaskólinn | 3.000.000 kr |
| Heimili kvikmyndanna – Bíó Paradís ses. | Alþjóðleg Barnakvikmyndahátíð í Reykjavík | 3.000.000 kr |
| Stofnun Árna Magnússonar í íslenskum fræðum | Hvað er með ásum? | 3.000.000 kr |
| Dansverkstæðið | Barna- og fjölskyldudagskrá á Dansverkstæðinu | 3.000.000 kr |
| Eva Rún Þorgeirsdóttir | Svakalega sögusmiðjan – raddir barna | 2.820.000 kr |
| Reykjavíkurborg | Sögur – Verðlaunahátíð barnanna | 2.600.000 kr |
| Tónlistarfélag Árbæjar | Ungir lagahöfundar – Lagasmíðabúðir í Tónhyl fyrir 16 – 18 ára | 2.295.000 kr |
| Söngskólinn í Reykjavík | Oliver! – hátíðaruppfærsla Ungdeildar Söngskólans í Reykjavík | 2.000.000 kr |
| Kópavogsbær | Tímamót og fögnuður. Raddir barna í Kópavogi | 1.725.000 kr |
| Grunnskólinn á Drangsnesi | Goðdalir – sviðslistasmiðja barna | 1.620.000 kr |
| LungA-Listahátíð ungs fólks,AL | LungA Ungar: Fjölskylduhátíð og listasmiðjur fyrir börn og ungmenni | 1.593.000 kr |
| Kammerhópurinn Reykjavík-Barokk | Krakkabarokk á ferð og flugi | 1.500.000 kr |
| Langanesbyggð | Tungubrestur og listsköpun | 1.435.000 kr |
| Kópavogsbær | Fjölþjóðlegir tónleikar á Barnamenningarhátíð 2025 í Salnum. | 1.340.000 kr |
| Minjasafn Reykjavíkur | Vaxtaverkir – sjónlýsingar og táknmálsleiðsögn | 1.060.000 kr |
| Sumartónleikar Skálholtskirkju | Barnamenningarhátíð Sumartónleikanna í Skálholti | 1.000.000 kr |
| Menningarfélagið Rebel Rebel | Viðburðir fyrir börn á Hamraborg Festival 2024 | 1.000.000 kr |
| Listahátíð í Reykjavík | Yes Yes Yes | 975.000 kr |
| Kópavogsbær | Together. Fjöltyngdar listsmiðjur fyrir börn og fjölskyldur | 960.000 kr |
| Kol og salt ehf | FURÐUVERUR Í MYRKRINU | 800.000 kr |
| Kópavogsbær | Blásum lífi í þjóðsögurnar | 663.000 kr |
| Natalia Duarte Jeremias | A moment of music with Natalia | 600.000 kr |
| Norræna húsið | Hvernig tala ég um bækur? myndlestur, samtal og fræðsla | 560.000 kr |
| Tónskáldafélag Íslands | Lúðrasveitargjörningur á Myrkum Músíkdögum | 530.000 kr |
| Náttúruskólinn, félagasamtök | Barnamenningardagurinn | 510.000 kr |
| Fjarðabyggð | Fjölbreyttar listasmiðjur fyrir börn í Fjarðabyggð | 500.000 kr |
| Eva Rún Snorradóttir | Býr barn hér? | 500.000 kr |
| Alþjóðlega tónlistarakademian í Hörpu | HIMA 2024 | 500.000 kr |
| Emma Louise Sanderson | Fjallabyggð Mural project and Children’s Workshop | 300.000 kr |
