Trausti Breiðfjörð Magnússon fæddist á Kúvíkum í Árneshreppi. Sonur Magnúsar Hannibalssonar og Guðfinnu Guðmundsdóttur. Hann ólst að mestu upp á Gjögri.
Trausti giftist Huldu Jónsdóttur frá Seljanesi 11. janúar 1951 og bjuggu þau sér heimili í Djúpavík 1951 en þangað hafði Trausti flutt með foreldrum símum nokkrum árum áður.
Trausti var sjómaður og sigldi á England öll stríðsárin. Hann varð m.a. skipstjóri á Erni ST 105 og á flóabátnum Hörpu ST. Hann vann við síldarverksmiðjuna í Djúpavík auk fleiri starfa tengdum sjó, vélum og búskap.
Hulda og Trausti í Djúpavík, þangað vill hann koma sem fyrst um leið og heilsan leyfir
Hann var farsæll í sínum störfum og vann björgunarafrek árið 1949 við skerið Barm utan við Reykjarfjörð. Þá fór hann á flóabátnum Hörpu ST 105 og náði að bjarga bát sem fór yfir grynningarnar á Barmi og náðist að bjarga öllum.
Mynd af Hörpu ST 105 og Trausta með skipsfélögunum
Árið 1959 varð Trausti vitavörður á Sauðanesvita við Siglufjörð og bjuggu þau Hulda þar til 1998 eða í 39 ár. Þá fluttu þau til Reykjavíkur.
Þau eignuðust fimm börn, Sólveigu sem nú er látin, Huldu Margréti, Magnús Hannibal, Vilborgu og Jón Trausta, fyrir átti Hulda soninn Braga.
Nafnarnir Trausti og Trausti Veigar við Sauðanesvita
Trausti fékk lungnabólgu og inflúensu í apríl og garnaflækju í kjölfarið. Af ótrúlegri eljusemi hefur hann náð sér á strik með góðum stuðningi fagfólks, ættingja og eigin dugnaði. Hann hefur verið á endurhæfingardeild aldraðra á Landakoti síðan 30. maí og væri útskrifaður ef heimahjúkrun væri til staðar.
Trausti hafur ávallt verið duglegur að hreyfa sig og hafa þau Vilborg dóttir hans gengið saman nánast daglega. Trausti er byrjaður að ganga aftur eftir veikindin og er þessi mynd tekin í byrjun ágúst
Galdurinn á bak við langlífið verður seint leystur en þess má geta að þau hjón Hulda og Trausti eru elstu núlifandi hjón á landinu svo þau hafa titil að verja.
Trausti hélt upp á 99 ára afmælið sitt á Hótel Djúpavík á síðasta ári til vonar og vara ef hann næði ekki 100 árunum. Trausti hét því að koma að ári ef hann yrði á lífi og hyggst því fara til Djúpavíkur og halda upp á þennan merka áfanga á næstu dögum.
Hulda og Trausti eru samanlagt 197 ára í dag og elstu núlifandi hjón á landinu
Trausti á bryggjurúnt í júní, stoltur af barnabarninu Geir F. Zoëga sem er skipstjóri á Polar Amaroq
Frændurnir Trausti og Gústi á góðri siglingu út Reykjarfjörðinn
Trausti er forsjáll, hann festi kaup á kistunni fyrir tveimur árum, hefur gengið frá öllum smáatriðum í sambandi við útförina þegar þar að kemur, ásamt því að velja legstað í Árneskirkjugarði á Ströndum
Sjá grein sem birt var á Sigló.is um Huldu og Trausta árið 2014. Eru samtals 189 ára gömul
Trölli.is óskar Trausta innilega til hamingju með tímamótin
Frétt: aðsend
Myndir: einkaeign og Kristín Sigurjónsdóttir
